Ish-deputetja e Partisë Demokratike, Jozefina Topalli tregoi në “Now me Erla Mëhillin” aktivitetet e Sali Berishës pasi u godit me grusht në fytyrë nga Gert Shehu, një 31-vjeçar i cili sipas mjekut Sadik Lala është pacient i tij dhe vuan nga çrregullime të shëndetit mendor.
“Është një energji, është unik në llojin e tij. Merr gjithë atë goditje brutale dhe ai vazhdon të ecë, qëndron edhe tre orë duke pritur të gjithë folësit që të mbaronin fjalimet e tyre, mban një nga fjalimet më brilante që kishte mbajtur ndonjëherë, kthehet përsëri në godinën e Partisë Demokratike, mban edhe një konferencë shtypi, ka probleme sepse dëmtimi shkon edhe më tej gjatë kohës më pas dhe ngrihet pret miqtë e tij nga Kroacia, ish-presidentin dhe del aty dhe çon në këmbë një sallë me të rinj, tani çfarë do thuash,” – u shpreh Topalli.
Ajo shtoi se Sali Berisha është një lidership.
Prokuroria e Tiranës pritet të kërkojë masën e arrestit me burg për agresorin e ish-kryeministrit Sali Berisha.
Gert Shehu do dalë paraditen e së premtes para Gjykatës së Tiranës për t’u njohur me masën e sigurisë. Ndaj tij janë ngritur dy akuza, goditje për shkak të detyrës dhe plagosje me dashje.
