Një makinë ka shpërthyer në flakë gjatë ecjes në afërsi të zonës së Institutit në dalje të Tiranës.
Policia bën me dije se gjatë shpërthimit të flakës në automjet udhëtonin 4 anëtarë të familjes, çifti i bashkëshortëve dhe dy fëmijët e tyre. 4 udhëtarët kanë marrë lëndihme të lehta dhe pas ndihmës mjekësore në spital janë larguar drejt banesës së tyre.
“Më datë 08.12.2022, në orën 21:45, në Institut, afër rrethrrotullimit, automjeti me drejtues shtetasin O. N., banues në Kamës, dyshohet se si pasojë e rrjedhjes së gazit ka shpërthyer në lëvizje e sipër. Në automjet udhëtonin së bashku me drejtuesin e automjetit edhe bashkëshortja shtetasja M. N., me dy fëmijët tyre të mitur. Si pasojë janë dëmtuar lehtë jashtë rrezikut për jetën të katër personat që ndodheshin në automjet dhe pas marrjes së mjekimit janë larguar në banesë”, thuhet në njoftimin e policisë.
Nga veprimet e para hetimore të kryera nga grupi hetimor dyshohet se shpërthimi ka ardhur nga rrjedhja e gazit të makinës, si pasojë e një defekti në impiantin e gazit.
Grupi hetimor nën drejtimin e Prokurorisë po vijon veprimet për sqarimin e plotë të rrethanave të ngjarjes.
