Një aksident i rëndë me pasojë vdekjen ka ndodhur mbrëmjen e së enjtes në Koplik.
Sipas njoftimit të policisë, shoferi 38-vjeçar ka humbur kontrollin e automjetit dhe për pasojë “Opeli” që ai drejtonte ka dalë nga rruga. Uniformat blu bëjnë me dije se përplasja ishte fatale për shtetasin me iniciale M.L, i cili ndërroi jetë gjatë rrugës për në spital.
“Rreth orës 21:00, tek rreth rrotullimi Koplikut, shtetasi M.L, 38 vjeç, banues në fshatin Hot, Malësi e Madhe, duke drejtuar automjetin tip Opel, dyshohet se ka humbur kontrollin mbi drejtimin e automjetit dhe për pasojë automjeti ka dalë nga rruga. Drejtuesi i automjetit shtetasi M.L, pësoi dëmtime të rënda dhe për pasojë gjatë rrugës për në spital ka ndërruar jetë”, thuhet në njoftimin e policisë së Shkodrës.
Grupi hetimor vijon veprimet për sqarimin e rrethanave dhe shkakut të aksidentit.
