Ceremonia e Superkupës së Shqipërisë pas duelit mes Tiranës dhe Vllaznisë nuk ka qenë si të gjithë të tjerat për një trofe të tillë. Kjo, pasi Tirana e mori vetë trofeun pa pritur t’ia dorëzonte dikush.
Ndërsa lojtarët u rreshtuan në tribunë dhe po bëheshin gati për të marrë trofeun nga duart e presidentit të FSHF-së, Armand Duka. Një nga makineritë e letrave dekorative u hap para kohe dhe kjo shtyu kapitenin e bardhebluve, Ismajlgeci, që të merrte vetë trofeun që ishte vendosur aty.
Ai e ngriti lart duke nisur kështu festën e shokëve pa pritur që para të gjithëve të vinte Duka, i cili doli vetëm në fund për fotot e rastit.
