Situata hidrike në Shqipëri paraqitet tejet pozitive pas reshjeve të dendura që përfshinë vendin një javë më parë, ku u regjistruan edhe përmbytje në zonën e Shkodrës dhe Lezhës, si pasojë e një keqmenaxhimit nga KESH të prurjeve në Kaskadën e Drinit.
Pavarësisht kësaj debate mbi aplikimin ose jo të fashës 800 kWh për mbi 70 mijë abonentë familjarë gjatë muajit dhjetor mbetet ende aktiv, pasi vendimi është pezulluar nga ERE për muajt tetor-nëntor, por s’ka ende një komunikatë për muajin e fundit të vitit.
Pikërisht kjo shtyu gazetarët që të kërkonin një përgjigje nga kryeministri Edi Rama gjatë konferencës së sotme, lidhur me çmimin e energjisë.
Rama tha se nuk ka një vendim që fuqizon fashën 800 kWh për dhjetorin, por informacionin e plotë do ta japë ministrja e Infrastrukturës dhe Energjisë, Belinda Balluku.
“Për çështje dy tre ditësh ministrja e energjisë do të informojë publikun me qëndrimin tone. Besoj se në kushtet kur kemi pasur reshje asnjëhere të mjaftueshme për hir të së vertetës, nuk jemi në drejtim të vendosjes së fashës për muajin dhjetor, të paktën nga informacionet që unë kam. Megjithatë informacionin e plotë do ta japë ministrja“, u shpreh kryeministri.
