Kur na ndajnë pak më shumë se 72 orë nga Samiti i liderëve të BE dhe Ballkanit Perëndimor në Tiranë dhe njëherësh protesta e thirrur nga Partia Demokratike, kreu i opozitës Sali Berisha i është drejtuar shqiptarëve me një mesazh në rrjetin social “Tik Tok”.
Në video, Berisha dëgjohet të rendisë të gjitha arsyet kryesore përse qytetarët duhet të dalin në shesh më 6 dhjetor, ku themelorja është t’I tregojnë krerëve të Bashkimit Europian “fytyrën” e vërtetë të qeverisjes së Edi Ramës.
Berisha e vendos theksin te shpopullimi duke thënë se Shqipëria është një vend në shpërbërje, nga e cila janë larguar nën drejtimin e Ramës, më shumë qytetarë se në Siri, që po përjeton luftë civile.
Ndër të tjera ai ndalet te vjedhja e 2.4 miliardë eurove, siç është përllogaritur nga autoritetet spanjolle nga një grup call-centerash me bazë në Shqipëri për të cilat eksizton një urdhër-arresti për ish-këshilltarin e Ministrisë së Mbrojtjes dhe ortakun e Olsi Ramës, Amant Josifi.
Ndërkohë, sa i përket protestës kryedemokrati ka deklaruar më herët gjatë javës se do të jetë e qetë dhe paqësore, pa tentative për të thyer “shtetërrethimin” që ka organizuar policia për të ruajtur rendin dhe sigurinë e liderëve të BE-së.
Protestën e thirrur nga Berisha e ka mbështetur dhe aleati i tij në opozitë kreu i Partisë së Lirisë, Ilir Meta. Pavarësisht se Policia e Shtetit nuk ka dhënë leje, Berisha ka këmbëngulur në zhvillimin e saj.
“Shqiptarët janë shndërruar në “boat people”, ndaj dhe duam që zëri ynë të dëgjohet. Protestojmë më 6 dhjetor, ora 12:00, të gjitë bashkë, në Bulevardin “Dëshmorët e Kombit” #sb”, shkruan Berisha përkrah videos.
MESAZHI I BERISHËS:
Të dashur miqtë e mi të TikTok. Me këtë mesazh dëshiroj t’ju sqaroj pse kemi thirrur protestën e datës 6 dhjetor! Kjo protestë, ditën e Samitit Europian, u thirr me qëllimin më madhor, për t’u bërë të qartë miqve në Shqipëri se Edi Rama duke shpenzuar 10-ra milionë euro dhe duke angazhuar 10-ra kompani lobimi, ka paraqitur tek ju një realitet shqiptar që nuk ekziston. E vërteta është se, sot Shqipëria është një vend në shpërbërje, nga e cila janë larguar në vitet qeverisëse të tij, më shumë qytetarë se në Siri, që po përjeton luftë civile.
Shqipëria është një vend i pasur, por shqiptarët janë sot banorët më të varfër. Kjo jo se nuk ka burime, por se burimet e tyre natyrore, pasuritë e tyre, buxheti i tyre vidhen, vidhen dhe vetëm vidhen nga qeveria. Edi Rama sot ka të gjithë pushtetet në duar. Kjo jo se ai i meritoi, por sepse ai ka vjedhur votën dhe nuk respekton vullnetin e lirë të qytetarëve.
Së fundmi, vjedhjet e Edi Ramës dhe klanit të tij kanë prekur edhe qytetarët tuaj. Me Bitcoin janë vjedhur nga klani qeveritar mbi 2.2 miliardë euro. Të gjitha këto janë vetëm disa elementë të hidhur të realitetit shqiptar. Ndaj dhe ne, si parti që përmbysëm komunizmin dhe sollëm pluralizmin, zhvilluam vlerat europiane në këtë vend. Antarësuam Shqipërinë në NATO, liberalizuam vizat dhe morëm rekomandimin për statusin e vendit kandidat.
Qëndrojmë besnikë në këto vlera dhe këto parime që ndajmë me kombet e vendeve tuaja. Kështu që jemi sot në këtë protestë, pikërisht për të ngritur zërin tonë. Se ne nuk jemi njerëz të varfër, por para së gjithash jemi të vjedhur. Se ne nuk votojmë të lirë dhe kjo vret shpresën e shqiptarëve, i shndërron ata në “bought people”, ndaj dhe duam që zëri ynë të dëgjohet. Faleminderit shumë!
@prof.dr.saliberisha Shqiptarët janë shndërruar në “boat people”, ndaj dhe duam që zëri ynë të dëgjohet. Protestojmë më 6 dhjetor, ora 12:00, të gjitë bashkë, në Bulevardin “Dëshmorët e Kombit” #sb ♬ original sound – Sali Berisha
