Nga Boldnews.al
Dhimitraq Toli, kreu i Bashkisë së Dropullit, është kujtuar për të bërë tendera të majmë disa muaj para zgjedhjeve. Me një të rënë të lapsit, Toli ka firmosur fituesin e tenderit 540 mijë euro për rikonstruksionin e një shkolle. Megjithëse ajo zonë po zbrazet dita-ditës, Bashkia e Dropullit më shumë po mendon për të bërë para, sesa të rikonstruktojë një shkollë.
Por, shkolla që kanë zgjedhur të rikonstruktojnë është në fshatin Bularat, atje ku çdo vit bëhen demonstrate për vrasjen e Kostandinos Kaçifës.
Megjithatë, thonë se paraja s’ka ngjyrë, aq më tepër patriotizëm apo edhe politikë. Ndoshta kështu ka vepruar edhe Toli, i cili vetëm disa muaj para zgjedhjeve, mendon që të shpenzojë një shumë të majme.
Kriteri kryesor i tenderit është “oferta më e ulët”. Pra, kush ofron më pak fiton edhe procedurën. Por, për Dhimitraq Tolin, ky kriter duhet “zhdukur”, pasi ka bërë të kundërtën; fitues shpall ofertën më të lartë! Një paradoks i madh, sidomos në këto kohë krize për të gjithë me rritjen e çmimeve. Por, si e arsyeton Bashkia e Dropullit këtë tender?!
Sipas dokumenteve që disponon BoldNews.al, në datën 24 nëntor 2022, kjo bashki ka shpallur fituesin e tenderit me objekt “rikonstruksion Shkolla e Mesme e Bashkuar Bularat, + kopshti Bularat, Dropulli i Sipërm”. Kohëzgjatja e punimeve do të jenë 6 muaj, pra duhet të përfundojnë në prill të vitit 2023, 1 muaj para zgjedhjeve. Goxha kalkulim z.Toli! Ndërkohë, në dokumentin e mësipërm shkruhet se “kriteret e përzgjedhjes së fituesit është ‘oferta ekonomikisht më e favorshme bazuar në çmim’”.
Por, shikoni se çfarë bën Toli me vartësit e tij në Bashkinë e Dropullit. Në tender morën pjesë bashkimi i operatorëve ekonomikë “2T” SHPK dhe “BAJRAMI N” SHPK me një vlerë 49.211.602 lekë pa TVSH. Oferta e dytë ishte e firmës “GJIKURIA” SHPK me vlerë 53.945.123 lekë pa TVSH. Fitues, sipas logjikës së Tolit dhe tolëve të tjerë të Dropullit është oferta e firmës “Gjikuria”, megjithëse ishte rreth 4 milionë lekë të rinj (40 mijë euro) më shumë sesa oferta më e ulët.
Më tej, në të njëjtin dokument, Toli e ka skualifikuar ofertën më të ulët pasi “nuk plotëson kushtin e kapacitetit teknik, të kritereve të veçanta të kualifikimit, të dokumentave standarte të tenderit”. Sipas bashkisë, operatori ekonomik duhet të ketë të punësuar dhe të figurojnë në listëpagesat e subjektit, personelin kryesor dhe punonjësit specialistë të kualifikuar, të vërtetuar me dëshmi kualifikimi profesionale, certifikata ose diploma ose certifikata të shkollës profesionale përkatëse për secilin specialitet të lëshuar nga institucione të licencuara nga organet përkatëse, kontrate pune individuale.
Dhe, për këtë arsye, u s’kualifikuan dhe fitues doli “Gjikuria”, e cila dita-ditës po fiton me dhjetëra tendera në Jug të Shqipërisë, madje ka fituar edhe koncesione apo është shpallur edhe “investitorë strategjike”.
Ndoshta Toli duhet të ketë menduar se me këtë firmë në krah “lobon” në Tiranë për rikandidimin. Ndryshe nga firmat e tjera, si “2 T”, e cila ka si pronar tepelenas, të cilët njihen për armiqësitë me zonën e Dropullit.
