Xhaxhai i Ervis Martinajt është shprehur se është i sigurt se nipin e kanë vrarë.
Ai akuzon kryeministrin Edi Rama për vrasjen e tij.
“Ne e dinim, se ne na e ka dhanë mesazhin ky kryeministri i Shqipërisë, fatkeqësi kombëtare, kryekrimineli i kombit shqiptar, Edi Rama na e ka dhënë mesazhin që në fushatën e vitit të kaluar, që i ka thënë se “i them atij drejtorit të basteve” dmth që atëherë na ka kërcënu, se “ia dimë targën e makinës” e kështu dmth. Unë e di zhdukjen e nipit tim, është kryeministri, organizatori është kryeministri Edi Rama me bandat e tij edhe me gjithë oligarkët që i kanë interesat nga bregdeti i jugut. Kryesori, kryekrimineli i zhdukjes së nipit tim. Se hasmi të vret, nuk të zhduk kufomën”, tha ai, në një intervistë për emisionin “Pa Gjumë” në Report Tv.
Zhdukja, aludimet dhe heshtja e institucioneve
Ervis Martinaj është denoncuar i zhdukur nga familjarë që prej 9 Gushtit. Në media janë publikuar pamje të kësaj dite, kur Martinaj shfaqet nën shoqërinë e efektivit të Operacionales Jeton Lami, i cili aktualisht është pas hekurave i akuzuar se ndihmoi të kërkuarin. Bashkë me ta duket edhe një vajzë. Veshur me një T-shirt e pantallona të shkurtra, Martinaj duket mjaft i qetë teksa futet në hotel me Lamin e vajzën që i shoqëron. Këto janë pamjet e tij të fundit.
Rreth fatit të të ashtuquajturit ish “Mbreti i Lojërave të Fatit”, është aluduar shumë. Disa ditë pas zhdukjes, një raportim mediatik pretendonte se trupi i Martinajt u gjet nga autoritetet i copëtuar në gjashtë pjesë. Të tjerë zëra pretendonin se Martinaj kishte inskenuar vdekjen për ti shpëtuar akuzave si dhe një hakmarrje të mundshme të kundërshtarëve.
Megjithatë, organet kompetente kanë dështuar të konfirmojnë njërën pistë, apo tjetrën, duke heshtar gjatë gjithë kësaj kohe.
Ervis Martinaj u shpall në kërkim pas arrestimit dhe dëshmisë së Nuredin Dumanit. Ky i fundit, tha se i ishte ofruar një shumë monetare paradhënie në këmbim të ‘kokës’ së Indrit Dokles dhe i ishte premtuar një tjetër pas ekzekutimit.
Berisha akuza Ramës
Për çështjen ka folur për kryeministri Edi Rama. Rreth dy javë pas zhdukjes së Martinajt dhe aludimeve rreth fatit të tij, ai ka deklaruar se “duhet të keni pak durim për të marrë një përgjigje përfundimtare dhe do ta keni shumë shpejt”.
Përgjigje, megjithatë, ende nuk ka ka.
Për çështjen ka folur dhe kreu i PD-së, Sali Berisha, i cili ka hedhur akuza ndaj Ramës.
“Nuk ka sektor që ky nuk ka shtrirë tentakulat e veta. Ia morën lojërat e fatit Ervis Martinit dhe tani thotë ku është. E di vetë ai ku është. Ai ishte biznesmen i lojërave të fatit. Olsi Rama është përfolur si njeriu në hije i lojërave të fatit”, tha Berisha më 21 Gusht.
“Shko e pyet Baton Stanishiçin dhe Ymer Çorapen se ata e dinë. A nuk shkruajtën ata se është në gjashtë copa në prokurori. Një njeri i zhdukur dhe një shtet bandit që thotë se është në gjashtë copa në prokurori”, shtoi Berisha, duke iu referuar një artikulli të publikuar nga gazeta online e Baton Haxhiut, që raportonte se trupi i pajetë i Ervis Martinajt është gjetur në gjashtë pjesë.
Këtë të Martë, është xhaxhai i Martinajt ai që akuzon direkt kryeministrin Edi Rama për vrasjen e tij.
