Shkatërrimi i bandës së drogës së “Fushëkrujës”, disa ditë më parë, dyshohet nga policia të ketë lidhje me tritolin e vendosur ditën e djeshme në banesën e shtetasit Roland Tema. Në fshatin Greps u bllokua 20 kg lëndë narkotike Cannabis Sattiva dhe u bë e mundur arrestimi i gjashtë anëtarëve të familjes Tema, të gjithë kushurinj. Duket se policia e ka lidhur këtë ngjarje me hedhjen e tritolit në banesën e një prej anëtarëve të tjerë të bandës së drogës, dhe kjo duket si pistë hakmarrje.
Personi i paindetifikuar hodhi një sasi lënde plasëse e llojit artizanal, në afërsi të banesës së shtetasit Roland Tema, 36 vjeç në fshatin Greps, Krujë. Ishte ora 01 e 56 minuta kur ndodhi ngjarja. Si pasojë e shpërthimit ka pasur vetëm dëme materiale, ku është thyer një xham i mjetit tip Fuoristradë ML, me targa AA 510 CB, në pronësi të shtetasit Tema, i parkuar në afërsi të banesës. Roland Tema është person me preçedentë penalë të mëparshëm. Efektivat e Policisë, po punojnë për identifikimin dhe kapjen e autorëve si edhe zbardhjen e plotë të ngjarjes.
Roland Tema ka deklaruar për Policinë se nuk ka asnjë ide kush mund të ketë qenë personi që e ka hedhur lëndën plasëse, duke theksuar se nuk ka pasur konflikte me persona të tjerë përgjatë këtyre viteve të fundit. Personi të cilit iu vendos eksploziv, i afërm me anëtarët e “bandës” së FushëKrujës, që u shkatërrua pak ditë më parë nga policia. Efektivat e Policisë po punojnë për identifikimin dhe kapjen e autorëve, si edhe zbardhjen e plotë të ngjarjes. Policia e Krujës ka shoqëruar disa persona për të mësuar më shumë rreth ndonjë konflikti të mundshëm të Roland Temës, mes tyre edhe persona që mund të kenë dijeni mbi ngjarjen. Të premten e shkuar, Policia e Durrësit zhvilloi një aksion në këtë zonë, duke kapur 6 persona me 20 kg kanabis. Në operacionin e koduar “Greps” u bë arrestimi i Ylli Temës, 33 vjeç; Artur Temës, 27 vjeç, Gëzim Temës, 37 vjeç, banues në Greps, FushëKrujë, si dhe Indrit Kapllanit, 31 vjeç, Gani Ramës, 47 vjeç dhe Edmond Matjas, 37 vjeç, banues në FushëKrujë. Sipas grupit hetimor, arrestimi i tyre u bë pasi në fshatin Greps, në FushëKrujë, gjatë kontrollit të ushtruar në banesën e shtetasit Gëzim Tema, të pranishëm ishin edhe shtetasit e tjerë të arrestuar, që u kapën në flagrancë duke paketuar një sasi lënde narkotike, me qëllim për ta shitur në qytetin e FushëKrujës. Në cilësinë e provave materiale u gjetën dhe u sekuestruan rreth 20 kg lëndë narkotike e dyshuar si kanabis sativa, një mjet luksoz tip “BMË” me targa AA 303 KZ, mjeti tip “Audi” me targa AA 949 LE dhe 12 aparate telefoni celularë.
