Në rrjetet sociale është publikuar një pamje aspak e pranueshme në dhomat e zhveshjes së kombëtares serbe, para ndeshjes së djeshme ndaj Brazilit në Botërorin e Katarit, ku u shpërfytyrua nga të gjitha anët, veçanërisht në pjesën e dytë dhe u mund 2-0 nga 5 herë kampionët e globit.
Një flamur serb me formën e hartës së Kosovës dhe mbishkrimin “ne nuk dorëzohemi” është varur mbi fanellat e dy prej futbollistëve të përfaqësueses serbe. Ky veprim është i papranueshëm, në një kohë kur shiriti i kapitenit me ngjyrat e LGBTI nuk lejohet nga qeveria botërore e futbollit.
Shfaqja e atij flamuri vjen pas tensionit të madh në veri të Kosovës, i shkaktuar për shkak të reciprocitetit me targat dhe para ndeshjes që pas disa ditësh Zvicra e Shaqirit dhe Xhakës do të luajë ndaj Serbisë. Kujtojmë që Federata helvete ia ndalon gjestin e shqiponjës dy shqiptarëve.
Mbetet të shihet nëse FIFA do të marrë ndonjë masë ndëshkuese ndaj kombëtares serbe, pasi shpalosja e atij flamuri në dhomën e zhveshjes së skuadrës përbën një provokim të pastër politik dhe nacionalist, në një kohë kur Kosova është vend i pavaruar dhe ka flamurin dhe simbolet e veta.
