Ashtu siç ishte paralajmëruar në një seancë maratonë, të mbushur me debat, akuza e kundërakuza mes mazhorancës e opozitës, Kuvendi i ka dhënë “jetë” projektit të “Durrës Yachts & Marina”, duke “asgjësuar” 800 mijë metër katrorë truall të portit tregtar të Durrësit.
E cilësuar nga kreu i PD, Sali Berisha si mega-afera më e madhe në Europë pasi arrin në shifrën 3 miliardë dollarë dhe shteti përveç tokës publike humbet edhe fitimin nga taksat përmes skemës së përjashtimit të investitorit, marrëveshja u votua me 74 vota pro dhe 35 kundër.
Në seancën plenare që zgjati mbi 14 orë ra në sy se kryeministri Edi Rama pavarësisht avokatisë së fortë që bëri për të mbrojtur projektin me Mohamed Alabbar (duke u djersitur e bërë qull në fjalimin e tij 53 minutësh, siç ai vetë e tregoi në Instagram), nuk ishte i pranishëm në momentin e votimit.
Sa i përket projektit ai parashikohet të zhvillohet në një sipërfaqe trualli prej 812 600 m2, që nga investimi i kalon në pronësi kompanive.
Aty parashikohen të ndërtohen 12.000 apartamente dhe 2 hotele me 850 dhoma në total. Faza e parë nis në 2023 dhe zgjat për 5 vite, ndërsa investimi është rreth 1 miliardë e gjysmë euro.
Marrëveshja ka një jetëgjatësi prej 35 vitesh, nga e cila qeveria ka 33.3% të dividentit. Sakaq, parlamenti ka votuar me 77 vota pro dhe 35 kundër Buxhetin 2023.
