Problematika të shkaktuara nga moti i keq që përfshiu vendin për 72 orë vijojnë të mbeten prezente në qarkun e Lezhës, ku edhe gjatë mbrëmjes e deri sot në mëngjes kanë vijuar reshje shiu me intensitet të mesëm dhe të lartë.
Niveli i reshjeve ka qenë rreth 40 mm dhe vijimi i tyre pa ndërprerje po ndikon negativisht në normalizimin e situatës. Situata është shqetësuese me lumenjtë Gjadër dhe Drin, me këtë të fundit që është vetëm 60 cm larg arritjes së kuotës kritike.
Ndërkohë që disa banesa janë të përmbytura, uji ka “përpirë” më shumë se 1000 hektarë tokë në të gjithë qarkun dhe ka bllokuar disa rrugë lokale.
Situata e deritanishme paraqitet si më poshtë:
-Në njësinë administrative Dajç, bashkia Lezhë, vijon të jetë e njëjtë si pasojë e reshjeve të rëna gjatë 24 orëve.
-Ura që lidh fshatin Gjadër me Zojs-Gramsh është e kalueshme dhe për mjetet e vogla.
-Rruga që lidh fshatin Blinisht-Superstradë (Lezhë-Shkodër) vazhdon të jetë e pakalueshme si rezultat i prezencës së ujit në trupin e rrugës. Rruga që lidh fshatin Blinisht-Baqel është e kalueshme plotësisht.
-Kemi rritje të nivelit në trupin e rrugës në fshatin Piraj, e cila është bërë e pakalueshme nga mjetet e vogla.
-Në fshatin Kakarriq vazhdon të kemi prezencë në 4 banesa, edhe pse niveli i ujit po vazhdon të ulet.
-Kemi 500ha sipërfaqe toke të përmbytura në fshatin Torovicë, njësia administrative Balldre, 800ha në njësinë administrative Dajç dhe Blinisht, bashkia Lezhë. Rruga që lidh fshatin Torovice me fshatin Malecaj, njësia Administrative Balldren, është e pakalueshme për mjetet e vogla.
-Hidrovoret po punojnë me kapacitet të plotë dhe pa ndërprerje. Konkretisht Droje, Shllinza, Tale, Ishull Shëngjin, Grykë Zezë, Gocaj nivelet e ujit janë nën kuota kritike dhe hidrovori Balldre rreth -1.2 m.
-Lumi Drin është në kuotën +1.40 m nga +2.0 m kuotë kritike. Lumi Gjadër ka kuota të larta, ndërsa lumi Mat ka rritje të kuotave por të papërfillshme. Në bashkinë Mirditë dhe Kurbin nga strukturat e MC nuk raportohen problematika.
