Sipas të dhënave të fundit nga Qendra Kombëtare Operacionale e Emergjencave Civile në Agjencinë e Mbrojtjes Civile, ka një përmirësim të situatës së krijuar si pasojë e reshjeve në vend, veçanërisht në dy qarqet më problematike, Shkodër e Lezhë.
Uji është tërhequr nga rruga nacionale, te ura e re e Bahçallëkut dhe pranë Harkut të Bërdicës, duke lejuar qarkullimin e lirë të automjeteve.
Ka prani uji në rreth 4356 ha sipërfaqe, ku tërheqja bëhet më ngadalë, por situata po monitorohet me vëmendje.
Forcat e Armatosura dhe të emergjencave civile kanë ndihmuar në evakuimin e rreth 318 banorëve në qarkun e Shkodrës, të cilat janë strehuar në konvikte apo pranë të afërmve të tyre. Po ashtu janë evakuuar edhe 57 krerë bagëti.
Përmirësim të situatëd raportohet edhe në Lezhë, por orët në vijim mbeten sërish kritike, bazuar në parashikimet e motit për shtim të reshjeve të shiut.
Në Bashkinë Lezhë zonat më të prekura janë njësitë Dajc, Blinisht, Balldren, ku po punohet për largimin e ujit nga 24 banesa.
Në monitorim është edhe situata sa i përket nivelit të lumenjve, veçanërisht lumit Drin, Gjadër dhe Erzen.
E normalizuar raportohet situata në Durrës, Kukës, Dibër.
Forcat e Armatosura janë në gatishmëri.
Pezullohet mësimi në 14 shkolla
Ministria e Arsimit njoftoi se në 14 shkolla në Shkodër nuk do të zhvillohet mësim as ditën e nesërme.
Dy viktima
Ditën e djeshme, dy persona humbën jetën në Malsësinë e Shkodrës. Në Bogë, prurjet e furishme të përroit Shkrel morën përpara makinën e Pjetër Rrushajt dhe 48-vjeçari bashkë me të birin humbën jetën.
Opozita akuza qeverisë
Nga ana tjetër, opozita ka hedhur akuza ndaj qeverisë për situatën e krijuar.
Në një deklaratë për mediat nga Shkodra, Berisha tha se përmbytjet erdhën nga keqadministrimi i kaskadave.
