Babë e bir humbën jetën në Malësi të Madhe pasi përroi i mori përpara ndërsa ishin duke lëvizur me makinë.
Ditën e diel, situata e përkeqësuar e motit e ka detyruar biznesmenin Pjetër Rushaj, që kishte lënë Angline për të investuar në Shqipëri, të shkonte në fshatin Bogë ku kishte ndërtuar dy shtëpi së bashku me të vëllanë, të shikonte nëse kishte dëmtime në banesa. Ai kishte marrë me vete edhe dy fëmijët e tij.
Në zonën e njohur si “Grykë Lugje” kishte tentuar të kalonte lumin, pasi në atë vend nuk ka urë, por qytetarët kalojnë përmes lumit. Ujërat e rrëmbyer të lumit nuk e kanë lejuar të vazhdojë duke i ndaluar makinën Benz.
Ai së bashku me djalin dhe vajzën kanë dalë nga mjeti, ndërsa vajzës i kishte thënë të shkonte në fshatin më të afërt të merrte kavo për të nxjerrë makinën.
Një valë e fuqishme e “Përroit të Thatë” ka rrëmbyer djalin e tij 14 vjeç, ndërsa Pjetër Rushaj është sulur që ta shpëtojë të birin. Asnjëri prej tyre nuk arriti që të dilte nga uji. 14-vjeçari ka qenë pjesë e ekipit të Akademisë së Futbollit “Djelmnia Shkodrane”.
Vajza e familjes ka prekur së fundmi zemrat e të gjithëve me një postim në rrjete sociale.
“Zoti na ka tha zemrat, shpirti juaj pushoftë në paqe”, ka shkruar Anais Rushaj krahas një foto ku shfaqet i ati dhe i vëllai.
