Një tragjedi e dyfishtë goditi familjen Rushaj ditën e dielë, pasi kryefamiljari Pjetër Rushaj dhe djali i tij i mitur rreth 14 vjeç humbën jetën pasi makina me të cilën udhëtonin u mor nga rrjedha e ujit të përroit në Malësinë e Madhe.
Mësohet se Pjetër Rushaj ishte biznesmen i njohur për ndërtimet karakteristike të zonës alpine në Malësinë e Madhe dhe Dukagjin.
Ditën e diel, situata e përkeqësuar e motit e ka detyruar biznesmenin, që kishte lënë Angline për të investuar në Shqipëri, të shkonte në fshatin Bogë ku kishte ndërtuar dy shtëpi së bashku me të vëllanë, të shikonte nëse kishte dëmtime në banesa. Ai kishte marrë me vete edhe dy fëmijët e tij.
Në zonën e njohur si “Grykë Lugje” kishte tentuar të kalonte lumin, pasi në atë vend nuk ka urë, por qytetarët kalojnë përmes lumit. Ujërat e rrëmbyer të lumit nuk e kanë lejuar të vazhdojë duke i ndaluar makinën Benz.
Ai së bashku me djalin dhe vajzën kanë dalë nga mjeti, ndërsa vajzës i kishte thënë të shkonte në fshatin më të afërt të merrte kavo për të nxjerrë makinën.
Një valë e fuqishme e “Përroit të Thatë” ka rrëmbyer djalin e tij 14 vjeç, ndërsa Pjetër Rushaj është sulur që ta shpëtojë të birin. Asnjëri prej tyre nuk arriti që të dilte nga uji. 14-vjeçari ka qenë pjesë e ekipit të Akademisë së Futbollit “Djelmnia Shkodrane”.
