Vendi u trondit dy ditë më parë nga një ngjarje e rëndë e ndodhur në fshatin Klos të Mallakastrës, ku një 89-vjeçar ndërroi jetë pasi u dhunua nga dy grabitës që hynë në banesën e tij për ta vjedhur.
Autorët e grabitjes që i morën jetën Çaush Shehaj nën kërcënimin e armës për të marrë nga shtëpia e tij një shumë parash, janë Musa Gudo dhe Ervis Halimi, tashmë të arrestuar dhe ndaj tyre rëndon akuza “Vjedhja me pasojë vdekjen”.
Por detaje të reja kanë dalë sot në dritë lidhur me grabitjen. Nipi i viktimës ka thënë për mediat se daja i tij ishte dhunuar barbarisht nga autorët dhe kërkoi dënim me varje për autorët.
“Jetonte me gruan në Klos të Mallakastrës. Gruaja është me sklerozë, jetonin bashkë në kushte jo të mira. Ishin vetëm pa përkrahje, ndaj ndodhi kjo. Ndjejmë keqardhje. Nëse ka ligje, për mua ata duhen varur. Të të vrasin në shtëpi brenda…të të vrasin në 2 natës… E kanë zhveshur, e kanë dhunuar, e kanë bastarduar, e kanë shëmtuar, bastarduar nga fytyra, nga kofshët, nga brinjët, si duket më mishi i bardhë”, zbuloi nipi i 89-vjeçarit.
