Një aksident tragjik me pasojë vdekjen e një 39-vjeçari ka ndodhur mbrëmjen e sotme, në fshatin Pjezë, Shijak, tek “Arena Karting Albania”.
Mungesa e sigurisë i mori jetën 39-vjeçarit nga Fieri i cili kishte paguar për tu argëtuar, por vdiq tragjikisht. Ai humbi jetën pasi u përplas kokë më kokë me një makinë tjetër elektrike “Go Kart” në pistën e “Arena Karting Albania 3”.
Një paketë e thjeshtë e cila kushton 25 mijë lekë të vjetra dhe gara zgjat 10 minuta, i mori jetën një personi që synimi i tij i vetëm ishte argëtimi.
Shtetasi F. A., 40 vjeç, i cili u përplas me shtetasin A. M., 39 vjeç, është arrestuar, por nuk janë dhënë detaje të tjera mbi arrestimin e tij.
Nuk janë sqaruar ende rrethanat e këtij aksidenti.
“Specialistët për Hetimin e Krimeve në Komisariatin e Policisë Shijak, kanë bërë arrestimin e shtetasit F. A., 40 vjeç, banues në Tiranë.
Mbrëmjen e sotme, në fshatin Pjezë, Shijak, te Arena Karting Albania, gjatë garave me mjete sportive, shtetasi F. A., duke drejtuar automjetin e tij, është përplasur me automjetin me drejtues shtetasin A. M., 39 vjeç. Si pasojë e përplasjes, shtetasi A. M., ka humbur jetën.”-njofton policia.
