Nga Boldnews.al
Gjykata Administrative e Tiranës ka regjistruar një padi, e një natyre disi të çuditshme.
Prokurorët e Strukturës së Posaçme Kundër Korrupsionit (SPAK) ankohen se janë paguar më pak se sa parashikon kuadri ligjor dhe kërkojnë nga trupa gjykuese që të pranojë kërkesën e tyre.
Sipas të dhënave të publikuara në faqen e Gjykatës Administrative, të paktën 7 prokurorë kanë bërë një kërkesë të tillë.
Por, në listë gjenden vetëm 6 emra prokurorësh, pasi formati i kufizuar i faqes së Gjykatës Administrative është i limituar dhe nuk ka mundur të shënojë edhe emrin e prokurorit të shtatë paditës.
Po çfarë kërkojnë prokurorët nga Gjykata Administrative?
Ata ankohen se institucioni, pra SPAK-u, u ka llogaritur gabim pagën referuese.
“Detyrimin e Prokurorisë së Posaçme, për të paguar pjesën e diferencës së papaguar të pagave në favor të palës paditëse për periudhën nga data 01.01.2019 e në vijim, mbi pagën referuese të saktë për llogaritje në vlerën 132.100 lekë, në vend të asaj të pasaktë në vlerën 118.100 lekë” është objekti i njëjtë i të gjithë magjistratëve të SPAK-ut.
Kërkesën e tyre, prokurorët e bazojnë në disa parashikime ligjore, përfshirë Kushtetutën, ligjin e posaçëm për Prokurorinë SPAK, Kodin e Punës dhe një Vendimi të Këshillit të Ministrave të marsit 2017.
Reforma në Drejtësi parashikoi që prokurorët e Strukturës së Posaçme Kundër Korrupsionit të përfshihen në kategorinë e zyrtarëve buxhetorë me pagat më të larta.
Paga e tyre arrin në mbi 3.5 milionë lekë të vjetra në muaj, ku krahas rrogës bazë, ata paguhen edhe me shuma për vështirësi në punën e tyre.
Ligjvënësi parashikoi që prokurorët e SPAK-ut të ishin të mirëpaguar, me qëllim që të kryenin sa më korrekt misionin e tyre në luftën kundër krimit të organizuar dhe korrupsionit në nivele të larta.
Në tre vitet e ekzistencës së tij, SPAK-u ende është larg pritshmërisë së opinionit publik. Por, mesa duket, ata nuk kanë pasur motivimin e duhur për të luftuar fort korrupsionin e niveleve qeveritare.
Dhe, kanë pasur të drejtë, pasi janë ndjerë të nënvlerësuar në pagesën që kanë marrë nga vetë institucioni.
Tashmë, pritet vendimi i Gjykatës Administrative. Nëse do të jetë në favor të kërkesës së prokurorëve, mund të shërbejë si një motiv më shumë për të rritur performancën në luftën kundër korrupsionit.
