Deputetja e Partisë së Lirisë, Monika Kryemadhi ka reaguar me anë të një postimi në FB, ku ka komentuar lajmet se inceneratorët kanë paguar bileta avioni për zyrtarët e shtetit.
Kryemadhi ngre pyetjen se ku kanë shkuar 800 milionë lekët që ka harxhuar inceneratori i Tiranës për udhëtime.
“Qenkan mbushur mediat me lajme se inceneratorët kanë paguar bileta avioni për zyrtarët e shtetit. Po 800 milionë lekët që ka harxhuar inceneratori i Tiranës për udhëtime, kanë financuar ndonjë fluturim VIP, për ndonjë ministër dhe deputet Rilindas, apo për shoqërueset e tyre?”, shkruan në FB, Kryemadhi.
Ky reagimi i Kryemadhit ka ardhur pasi u zbardhën disa nga udhëtimet që “bosat” e incenertorëve bënë me supervizorin Arben Dervishaj, ish-deputetin socialist Alqi Bllako si dhe ish-drejtoreshën e dhënies së koncesionit Etleva Kondi.
“Nga këqyrja e sistemit TIMS rezulton se Arben Dervishaj ka udhëtuar me avion më datë 11 prill 2017 nga Rinasi në drejtim të Torinos në Itali. Me datë 12 prill është kthyer nga qyteti i Romës në Tiranë për të ndjekur ndeshjen e futbollit që do të zhvillohej ndërmjeti Juventusit dhe Barcelonës. Bileta për të ndjekur ndeshjen në shumën prej 2250 eurosh është paguar nga Klodian Zoto”, thuhet në dosje.
Një tjetër pagesë, biznesmeni Dervishaj e ka përfituar dhe për një udhëtim që ka kryer në Izrael me vajzën e tij. Ka qëndruar në hotel Kroun Plaza tel Aviv dhe pagesat u kryen nga llogaria bankare e Klodian Zotos me një vlerë prej 1920 eurosh.
Përfitime ka marrë dhe Alqi Bllako, ish sekretari i përgjithshëm i Ministrisë së Mjedisit. Babai i tij, i cili rezultonte i punësuar në incenerator, është shpërblyer me rreth 15 milionë lekë paga nga tetori 2018 deri në janar të 2020, thuhet në dosje.
