Shtatëmbëdhjetë persona janë mbajtur në paraburgim pas sulmit të së dielës në Stamboll, për të cilin autoritetet kanë fajësuar militantët kurdë të PKK-së dhe aleatët e tyre në Siri, njoftuan sot mediat turke. Askush deri më tani nuk ka marrë përgjegjësinë për sulmin.
Mes atyre 17 personave është edhe gruaja e akuzuar për vendosjen e bombës në një stol në Avenue Istiklal në zemër të Stambollit.
Gjashtë persona humbën jetën dhe 81 të tjerë u plagosën nga shpërthimi që ndodhi mbrëmjen e 13 nëntorit në këtë rrugë të frekuentuar të këmbësorëve.
17 të dyshuarit, disa prej të cilëve akuzohen se kanë ndihmuar drejtpërdrejt në kryerjen e sulmit, u burgosën në burgun e Marmarasë – deri vonë i njohur si burgu Silivri (Silyvria) – në periferi të Stambollit. Deri në fillim të javës ishin arrestuar 51 persona.
