Bordi i Transparencës është mbledhur ditën e sotme për të vendosur që të ulë çmimin e karburantit në vend.
Duke krahasuar vendimin e sotëm me atë të 16 nëntorit rezulton se kemi të bëjmë me një rënie të lehtë të çmimeve pasi nafta do të shitet me 3 lekë më pak dhe benzina me 4 lekë. Ndërkohë, është ulur edhe çmimi i gazit që do të shitet me 3 lekë më pak.
Por, në një kohë kur çmimi i naftës në bursën ndërkombëtare është në “pikiatë” bordi i ngritur nga kryeministri Edi Rama tallet me shqiptarët duke bërë një ulje thuajse qesharake.
Bordi i cilësuar si “komunist” edhe nga vetë kryeministri, ka favorizuar gjatë 10 ditëshit të fundit kompanitë e naftës, të cilat po blejnë më lirë në bursë dhe po shesin më shtrenjtë. Një prej faktorëve që e tregon këtë është vonesa në uljen e çmimit, kur në bursa nafta zhvlerësohet, apo kur zhvlerësohet edhe dollari.
Kjo ka ndodhur disa herë që nga koha kur bordi vendosi më 12 nëntor çmimin 223 për litër dhe mjafton një krahasim me vendimet e Entit Mbikëqyrës të tregut të karburanteve në Maqedoninë fqinje, për të kuptuar diferencën në çmim.
Në Shkup u dha urdhër për uljen dy herë të çmimit më 14 nëntor dhe dy ditë më pas në një total prej 10 lekësh, ndërsa benzina gjithashtu u ul me 5 lekë.
Në fqinjin lindor argumentohet se këto çmime të reja për naftën vijnë si shkak i uljes së çmimeve në tregjet botërore dhe një arsye tjetër është dobësimi i dollarit në kursin valutor, por Bordi në Tiranë edhe ndryshimet që lajmëron i ka me “pikatore” dhe përherë jo më të mëdha në vlerë se 2-4 lekë.
NJOFTIMI I BT:
Referuar të dhënave lidhur me bursën Platts të datës 17.11.2022, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 907, – 42 nga data 15.11.2022, $/ Ton, ndërsa çmimi i Gazoilit/Diesel është 987, -37 nga data 15.11.2022, $/Ton. Kursi i këmbimit i BSH ka pësuar rritje në 113.39 (+0.66 nga data 15.11.2022).
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 218 lekë/litri, ndërsa i shitjes me shumicë jo më shumë se 206 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 200 lekë/litri, ndërsa i shitjes me shumicë jo më shumë se 188 lekë/litër.
Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.
Çmimi i gazoilit për peshkim është vendosur 121 lekë/litër.
Çmimet e caktuara nga Bordi do të hynë në fuqi në datë 18 Nëntor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
