Kryetari i PD-së, Sali Berisha, gjatë një emisioni televiziv këtë të Enjte, hodhi poshtë akuzat e autoriteteve britanike në sanksionet ndaj tij.
Berisha bëri fajtor ambasadorin britanik në vendin tonë, duke u shprehur se ka keqinformuar autoritetet britanike.
“Do publikohen dëshmi tronditëse për shpifje të ambasadorit që tregon se është racist ndaj shqiptarëve, po s’besoj. Ose është i korruptuar, se ato që ka shkrua ai për qeverinë e tij do bënte të skuqej çdo njeri i ndershëm në Britani dhe Shqipëri, kudo”, tha Berisha.
Ai sqaroi se është akuzuar për lidhje me një nga bandat e Elbasanit.
Berisha u shpreh se është personi që ka denoncuar këtë bandë më shumë se asnjë politikan tjetër.
“Berisha është njeriu që ka denoncuar tre herë më shumë të marrë së bashku. Kush e ka thënë këtë? (Akuzën) Këtë e ka thënë Basha në një moment kur po bëja transparencë se isha i vetmi që çdo bande i numëroja anëtarët. A e bën ai për të ndihmuar krimin në Shqipëri? A e bën për korrupton, politik, monetar, shtrati, unë se di”, tha Berisha.
Më tej, shtoi se një tjetër akuzë ndaj tij nga Britania është se ka lidhje me Fation Dautin, një person që sipas mediave britanike, është dëbuar nga Britania dhe ndaj tij janë ngritur akuza penale.
“Fatjon Dautin unë se kam taku ndonjëherë. Për herë të parë e dëgjova kur shkuam në selia dhe çau një derë. Personi që e bëri ishte Fatjon Dauti. Pa asnjë diskutim nuk e mohoj që ka qenë simpatizant i PD, po pa asnjë lidhje me Berishën. Unë s’isha kryetar kur ai mbështeste PD-në. Ky paraqitet si lidhje imja me organizatat kriminale. Kur ka qenë ai në Britani unë kam qenë kryeministër dhe kanë ardhur në shqipëri zyrtarë britanikë për të më falenderuar për kontributin që kam dhënë në luftën ndaj krimit”, shtoi ai.
Berisha hodhi poshtë dhe akuzën se ka ndikuar në mënyrë të paligjshme në pasurimin e Damir Fllaziç, ish-këshilltarit të tij.
