Faruk Ozer, i njohur si “bosi turk i kriptovalutave” do të ekstradohet në Turqi. Vendimi u mor këtë të Enjte nga Gjykata e Elbasanit, që pranoi kërkesën e prokurorisë.
Pala mbrojtëse nga ana tjetër, ka kërkuar mos-ekstradimin e 28-vjeçarit Ozer, duke argumentuar se procesi ndaj tij në shtetin turk është politik.
Hetimet
Sipas hetimeve, autoritetet gjyqësore të Stambollit në Turqi kanë filluar procedimin penal ndaj tij më 22.04.2021, për veprën penale të “Mashtimit kompjuterik në rrethana rënduese”.
Në vitin 2017, ai ka krijuar një platformë elektronike të monedhave të kriptuara të quajtur THODEX, për shkëmbimin e monedhave virtuale (crypto currency).
Nëpërmjet kësaj ka mashtruar rreth 391 mijë anëtarë të saj. Pasi ka grumbulluar asete dixhitale në vlerën e rreth 2 bilion dollarë, ka pezulluar/bllokuar platformën në fjalë dhe në datën 20.04.2021 është larguar nga Turqia. Në datën 20.04.2021, ky shtetas ka hyrë në territorin e RSH.
Prokuroria e Stambollit, sipas raportimeve të mediave turke, ka kërkuar 40 mijë e 540 vite burg ndaj Ozer.
Arrestimi
Në Gusht të këtij viti, Ozer u arrestua në Jug të vendit, për llogari të autoriteteve turke.
“Ky shtetas u kap në Himarë pasi ishte shpallur në kërkim ndërkombëtar nga Interpol Ankara. Gjykata e Lartë e Stambollit ka lëshuar urdhër arresti në vitin 2021, ndaj 28-vjeçarit për veprat penale ‘Krijimi i organizatës kriminale’ dhe ‘Mashtrimi me pasoja të rënda’”, njoftoi policia më 30 Gusht.
Pas arrestimit, u la nën masën “arrest me burg”.
