Lejet e ndërtimit dhe shpenzimet e luksit nga Bashkia e Tiranës janë dy elementët kryesorë tek të cilët është ndalur sot kandidati i Partisë Demokratike për Primaret e kryeqytetit, Belind Këlliçi.
Sipas tij, Veliaj ka nisur të lançojë tendera luksi dhe t’i përdorë paratë e buxhetit të bashkisë për shpenzime elektorale, ndërsa lëvizja më e fundit e kryebashkiakut është një tender 5 miliardë lekë për të blerë pemë, kur në Tiranë sheh vetëm pallate të reja mes lagjesh që mbijnë si kërpudha.
“Ditën Veliaj ju del në çdo ekran duke u ankuar se lufta në Ukrainë paska krijuar krizën ekonomike në Tiranë. Padyshim që krizën ekonomike nuk e ka krijuar ky me Ramën, që kanë 9 vjet në qeverisjen e vendit. Fajet i ka opozita, që bashkë me Rusinë kanë pushtuar Ukrainën. Por kjo nuk e pengon kryebashkiakun e Sorosit të bëjë natën plane për tendera luksi dhe shpenzime elektorale, sepse ai është një kandidat qelie, jo bashkie. Së fundmi, Erion Veliaj po i faturon banorëve të Tiranës 5 miliardë lekë, me justifikimin se do të blejë pemë. Ndërkohë qytetarët e Tiranës shohin vetëm pallate të reja mes lagjesh, që zënë ato pak hapësira të mbetura, dhe thithin ajrin e ndotur me smog. Kam për t’ia numëruar këto pemë një e nga një!”, shkruan Këlliçi.
Në vijim, ai bën një premtim të fortë duke theksuar se nëse i besohet drejtimi i kryeqytetit do të auditojë çdo leje ndërtimi dhe çdo procedurë që Erion Veliaj ka dhënë sa kohë ka qenë në krye të Bashkisë së Tiranës.
“Unë i jap fjalën banorëve të Tiranës se do auditoj çdo leje ndërtimi dhe çdo procedurë që Erion Veliaj ka dhënë në krye të Bashkisë Tiranë! Do t’i numëroj çdo rikonstruksion fasade që ai ka bërë për të mashtruar qytetarët, me vlera disa herë më shtrenjtë se puna reale e kryer. Do t’i bëj evidencën e çdo liste punimesh të kryer për çdo metër asfalt elektoral të hedhur. Do t’i bëj evidencën e çdo paraje të dhënë OJF-ve të tij dhe atyre të kontrolluara prej tij, duke i maskuar pas aktiviteteve kulturore”, thekson Këlliçi.
