“Shqipëria nuk ka një infrastrukturë të mirë të gazit, do ta përmirësojmë duke investuar në këtë fushë”.
Ishte kjo fjalia që mori vëmendjen nga konferenca përbashkët për shtyp e Presidentit Bajram Begaj me homologun e tij nga Azerbajxhani, Ilham Aliyev.
Aliev shprehu kështu hapur aspiratat e vendit të tij për të qenë investitorët në ndërtimin e rrjetit të gazit në Shqipëri, një projekt shumë i përfolur gjatë kohës së nënshkrimit të marrëveshjes për gazsjellësin TAP, por që nuk u mor kurrë në konsideratë gjatë 10 viteve nga kryeministri Edi Rama.
Teksa vlerësoi bashkëpunimin e deri tanishëm mes dy vendeve në projektin e TAP dhe tha se gazsjellësi që kalon përmes Shqipërisë pritet ta dyfishojë kapacitetin për në Evropë deri në vitin 2027, Aliyev zbuloi se ka bisedime për nisjen e gazifikimit të vendit.
“Sa i takon furnizimit me gaz, Azerbajxhani dhe Shqipëria janë pjesë e projektit TAP, ku vendet tona kanë bashkëpunuar me shuëm sukses. Deri në 2027 mbështetur në këtë memorandum kemi planin të dyfishojmë vëllimin e furnizimit me gaz për Evropën. Ky gaz do të kalojë përmes Shqipërisë. Aktualisht TAPI dhe Tanapi mund të diskutohet për të rritur kapacitetet e tyre me 2 herë. Mendoj se të dy këta gazsjellës mund të diskutohen, kësisoj zyrtarët e BE-së po na vlerësojnë si një partner i besueshëm. Lidhur me infrastrukturën e gazit, vendi ynë kërkon të ndihmojë për zhvillimin e saj në Shqipëri, kemi folur për këto alternative, ka shumë ide, deri me tani nuk ka pasur një infrastrukturë të tillë në Shqipëri, Azerbajxhani mund të marrë pjesë si investues në këtë fushë”, tha ai.
Hera e fundit që në Shqipëri është diskutuar për gazifikimin e vendit ishte prilli i këtij viti, ku në Komisionin e Veprimtarisë Prodhuese, përfaqësuesi i ERRE Maksim Shuli shpaloi idenë e qeverisë si një alternativë për të ulur konsumin energjisë elektrike dhe që kushton plot 4 miliardë euro.
“Ka një studim për gazifikimin e Shqipërisë i bërë me mbështetjen e TAP që ka 6 projekte prioritare. Gazifikimi i gjithë Shqipërisë nga fieri deri në Sarandë, dhe njëkohësisht shtrirja e IAP (Projekti i gazsjellësit Jonian-Adriatik), nga Fieri deri në Kroaci. Afërsisht për gazifikimin e vendit duhen 4 miliardë euro, nuk janë pak, por 6 projektet emergjente janë nga Vlora deri në Fieri që është rreth 29 milionë euro është bërë projekti i zbatimit, siç është bërë projekti për IAP. Projekti IAP do të zhvilloj infrastrukturën dhe çdo qytet i vendit do të krijoj degë si në Kukës ku do të lidhet me ALKOGAP (Gazsjellësi Shqipëri-Kosovë “ALKOGAP”), që të përdoret gazi edhe në Kosovë”, tha asokohe Shuli.
