Avokatët mbrojtës të 5 të akuzuarve për vrasjen e Klodian Saliut dhe Vajdin Lames (ngjarje të ndodhura në vitin 2005), kanë kërkuar në seancën e sotme gjyqësore që të quhet i pavlefshëm ekspertiza mjeko-ligjore e kryer ndaj dëshmitarit të drejtësisë Luftar Reçi.
Avokatët që mbrojnë të pandehurit Lulzim Berisha, Indrit Rusi, Viktor Ymeri, Emiljano Shullazi dhe Imdrit Tallau pretendojnë se Reçi vuan nga sëmundja e mitomanisë, që njihet si mashtrimi në mënyrë të vazhdueshme.
Në aktekspetimin e parë, mjekët kanë dalë në konkluzion se Reçi ka çrregullime të ankthit, por deklarimet e dhëna prej tij, në lidhje me zbardhjen e 2 ngjarjeve kriminale mund të merren si provë nga prokuroria.
Trupi gjykues i kryesuar nga gjyqtarja Flora Harajdinaj, është tërhequr për vendim, ku pritet që te shprehen lidhur me kërkesën e avokatëve mbrojtës.
Ndërkohë, të pandehurit për dy vrasjet e bujshme që tronditën kryeqytetin në 2005 përballen me akuzat e “vrasjes me paramendim”, “Mbajtjes pa leje të armëve luftarake me pasoja të rënda”, “Grup i strukturuar kriminal”, si dhe të “Vrasjes në rrethana të tjera cilësuese”, kundër dy ose më shumë personave, të kryer në bashkëpunim në formën e grupit te strukturuar kriminal.
Ata u vunë nën akuzë pas dëshmive të Luftar Reçit, i cili mori statusin e bashkëpunëtorit të drejtësisë. Ai zbardhi dinamikën e vrasjeve që tronditën vendin në vitin 2005 si dhe implikimin e ish-bandës së Durrësit.
