Pas një situate “shterpë” prej gati 2 javësh, Bordi i Transparencës është mbledhur duke ulur në mënyrë qesharake çmimin e naftës dhe të benzinës.
Në një kohë kur çmimi i naftës në bursën ndërkombëtare është në “pikiatë” bordi i ngritur nga kryeministri Edi Rama tallet me shqiptarët duke bërë një ulje qesharake me vlerë 5 lekë.
Sipas vendimit të fundit të Bordit, një litër naftë do të tregtohet me 227 lekë, nga 232 lekë që ishte ditë më parë. Pas orës 18.00 të ditës së sotme benzina do të shitet me 210 lekë për litër, nga 212 që ishte vendimi i dy javëve më parë.
Vlen të përmendim që kjo ulje e lehtë e çmimit vjen 24 orë pasi kreu i Partisë Demokratike, Sali Berisha ka paralajmëruar protestë kombëtare përballë Kryeministrisë.
Në tregjet ndërkombëtare, nafta tregtohet me rreth 90 dollarë/fuçi, në nivelet e shkurtit, përpara se të fillonte shtrenjtimi për shkak të problemeve me furnizim, që u shkaktuan nga sulmi i Rusisë ndaj Ukrainës.
Në Shqipëri, niveli maksimal i naftës arriti në 265 lekë për litër, ndërsa për periudhën mars-nëntor, karburanti është tregtuar midis 230-240 lekë për litër, që është 20-30% më shtrenjtë se niveli i shkurtit.
