Rreth një javë më parë deputeti i Partisë Demokratike, Edmond Spaho i mbylli gojën ministrit të Drejtësisë Ulsi Manja, i cili e kishte akuzuar në një prej seancave plenare se kishte qenë bashkëpunëtor i ish-Sigurimit të Shtetit.
Spaho postoi në Facebook raportin zyrtar të hetimit të Autoritetit të Dosjeve për figurën e tij gjatë viteve të diktaturës komuniste, ku vërtetohet se ai nuk ka mbajtur asnjë nga funksionet që ligji i ndalon të marrin funksione publike.
Ndërkohë, në seancën e sotme plenare Spaho përgjigjen e Autoritetit të Dosjeve e ka çuar në Parlament, duke e vendosur në ulësen e ministrit të Drejtësisë, Ulsi Manja.
Duke iu referuar thirrjes së Manjës përkundrejt tij se do të dorëzonte mandatin në rast se Spaho i provonte se nuk kishte qenë bashkëpunëtor, deputeti i PD tha se nuk pret nga ministri që të mbajë fjalën, por të paktën të kërkojë ndjesë publike për të pavërtetat që ka përmendur.
“I kërkova të kërkojë ndjesë, por nuk e bëri. Unë jam verifikuar disa herë, por hoqa dorë nga ato verifikime dhe kërkova verifikim të thellë nga autoriteti ekzistues, pa u miratuar ligji jua. Kini pak respekt për dinjitetin e njeriut. Tjetër është politika, tjetër dinjiteti. Duroni sot mos më ndërprisni. U verifikova, kam marrë përgjigjen nga Autoriteti, të firmosur nga gjithë anëtarët dhe këtë po ia jap Ulsi Manjës. I kërkoj një gjë, pavarësisht se tha do lë mandatin, e di që nuk e lë mandatin, të vijë këtu dhe të kërkojë ndjesë publike. Nëse nuk më kërkon ndjesë publike dhe unë do reagoj sipas sjelljes së Ulsi Manjës. Spiunët shkoni kërkojini te të tjerë njerëz”, tha Spaho.
