Gjykata Administrative e Tiranës vendosi të martën pezullimin e çdo veprimi për prishjen e “Pallatit 145” të dëmtuar nga tërmeti i 26 Nëntorit 2019 në Kombinat.
Pas rastit me “pallatin 146”, tashmë Gjykata pranoi padinë e banorëve që pengon në këtë mënyrë prishjen e ndërtimeve në këtë zonë, ndërkohë që sipas planeve të rindërtimit të qeverisë janë parashikuar të shemben 23 ndërtesa të tilla.
Banorët e pallatin nr. 145, në Kombinat, iu drejtuan gjykatës pasi Këshilli Bashkiak i Tiranës vendosi prishjen e ndërtesës, me argumentin se objekti ka dëmtime të konsiderueshme.
“Një tjetër padi, nga ato qe Rama quajti “absurde”, u pranua sot nga Gjykata Administrative. Tani le te vazhdoje programi me lajmet nga SPAK-u qe janë si karamele për publikun. Ndërkohe Gjykata Administrative urte e bute ja fut këmbët në një këpucë pushtetit”, shkruan avokati Dorian Matlija.
Çfarë ndodhi?
Në gjykatë banorët prezantuan prova dhe ekspertiza se vendimmarrja për prishjen e pallatit është marrë mbi fakte të pavërteta. Dëmtimet reale janë vetëm të dorës së dytë, më së shumti dëmtime të suvasë, ndërsa në aktin e ekspertimit të Institutit të Ndërtimit thuhet se dëmtimet janë të rënda, duke paraqitur se vlera e riparimit të pallatit është sa 72 % e kostos së rindërtimit.
Aktet e ekspertimit të Institutit të Ndërtimit janë kontestuar nga banorët e prekur dhe ky është rasti i tretë ku gjykata vendos pezullimin e vendimeve administrative për prishjen e ndërtesës, deri në gjykimin e plotë të çështjes.
– Manipulimi i akteve të ekspertimit
Ka mjaftuar një akt i përciptë ekspertimi nga Instituti i Ndërtimit, që një vit më vonë Bashkia e Tiranës ta vendosë ndërtesën në listën e atyre objekteve që duhet të shkatërrohen.
Banorët janë njohur me këtë Vendim vetëm kur nisën të shfaqen fadromat në në zonën e Kombinatit.
Banorët e zonës iu drejtua avokatëve Dorian Matlija dhe Irena Dule për të mësuar ligjshmërinë e vendimeve, por ajo që u zbulua ndoshta përbën skandalin më të madh të rindërtimit të objekteve të dëmtuara nga tërmeti në Shqipëri. Akti i ekspertimit të Institutit të Ndërtimit, mbi të cilin janë marrë vendimet e Bashkisë së Tiranës, ishte i pasaktë në fakte dhe në shifra.
