Një tërmet me magnitudë 4.9 ballë të shkallës Rihter ka goditur lagjen Buça në provincën turke të Izmirit. Ministri i Brendshëm turk, Suleyman Soylu tha se 31 persona u dërguan në spital për shkak të panikut të shkaktuar nga tërmeti që goditi zonën në orën 3:20 të mëngjesit me kohën lokale, ndërkohë raportohet për një të vdekur.
Autoriteti i Menaxhimit të Fatkeqësive dhe Emergjencave (AFAD) tha se tërmeti me magnitudë 4.9 e kishte epiqendrën në rrethin Buça të Izmirit dhe ra në orën 3:29 të mëngjesit. Tërmeti u pasua nga disa pasgoditje dhe u ndje në zonat përreth. Kryebashkiaku i Izmirit, Tunç Soyer tha se nuk kishte raportime për dëme të mëdha përveç minares së rrëzuar.
“Përveç panikut, frikës, alarmit të shkaktuar te banorët tanë, nuk kemi marrë asnjë raport negativ”, tha Soyer për televizionin HaberTurk.
Një 19-vjeçar u hodh nga dritarja e banesës për shkak të panikut, gjendja e tij raportohet e qëndrueshme por iu nënshtrua një operacioni. Ndërkohë autorirtetet kanë përsëritur apelin për ruajtjen e qetësisë ndërsa thanë se ndërtesat e vjetra janë më të ndjeshme nga lëkundjet. Duke folur për Agjencinë e Lajmeve Demirören (DHA), profesori Hasan Sözbilir, i cili drejton një qendër kërkimore për tërmetet në Universitetin Dokuz Eylül të Izmirit, tha se linja e thyerjes nën Buça është aktive, por nuk mund të gjenerojë një tërmet me magnitudë më të madhe se 6.0.
