Debatit për të rinjtë dhe familjarët shqiptarë që po emigrojnë drejt Britanisë së Madhe duke shfrytëzuar rrugën e kalimit të Kanalit me gomone, kryeministri Edi Rama nuk ka mundur t’i shmanget as në takimin me fermerët dhe drejtuesit e pikave të grumbullimit në Lushnjë.
Teksa ka kritikuar ata që thonë se “fshati po vdes e nuk ka bukë të hanë”, Rama u ndal edhe te emigrantët duke thënë se ata që ikin kanë të drejtën e tyre të kërkojnë më shumë.
“Ata që ikin kanë të drejtë të kërkojnë më shumë. A gjejnë apo jo më shumë, kjo është çështjes tjetër. Si hyjmë kësaj. Ishim më parë në një fabrikë mermeri, që ishin disa punëtorë që ishin kthyer. Por të flasësh me paqe e nder dhe të tregosh se ‘fshati po vdes, dhe njerëzit nuk kanë bukë të hanë’, por këto eksporte kush po i bëjnë? Të vdekurit. Puna e njerëzve nuk lindi me qeverinë tonë, por njerëzit ishin në hall të madh. S’kishte pika grumbullimi”, tha shefi i qeverisë.
Në vijim, Rama duke kujtuar sipas tij një thënie të gjyshes së tij të ndjerë tha se pikat e grumbullimit që qeveria ka ndihmuar për t’u ndërtuar me fonde dhe subvencione kanë mbledhur bashkë të majtë e të djathtë përtej politikës së ditës.
“Thoshte gjyshja ime; komshi i lumtur, shtëpi e lumtur. Zhvillimi i pikave të grumbullimit në Lushnjë, ka bashkuar totalisht PS me PD. S’mund të vijë politika të bëjë punët këtu. Të futen mollët në sherrin politik. Më vjen mirë që të gjithë grumbulluesit, edhe ata të PD po ia marrin PS dhe qeverisë së saj produktin. Perfekt. Aq më tepër sot kur kuptohet se PD është bërë si ato mallrat që ta kthen pika e grumbullimit”, shtoi ai.
