Jimmy Carter, George Bush, George W. Bush, Bill Clinton dhe Barack Obama, pesë ish-presidentët amerikanë u bënë bashkë në një koncert bamirësie me në fokus mbledhjen e ndihmave financiare për t’u ardhur në ndihmë të dëmtuarve nga uraganët në Shtetet e Bashkuara.
Një iniciativë e tillë, që në fakt tregon edhe unitetin e popullit amerikan, u përgëzua edhe nga opresidenti aktual Donald Trump, i cili me anë të një videomesazhi përgëzoi nismën e parardhësve të tij.
Bill Klinton tha në fjalën e tij se “duhet bërë ende shumë punë në Teksas dhe në Florida, ndërsa te miqtë tanë në Porto Riko dhe Ishujt Virxhin vetëm sa është filluar të hapet rruga, për të hedhur pas krahëve katastrofën me të cilën u përballën. Por, ky mund të jetë një fillim i ri, nëse ne bëjmë atë që duhet, e provojmë se zemra e amerikanëve është më e madhe sesa problemet tona”.
Silidaritetin e amerikanëve me njerëzit në nevojë e vuri në dukje edhe ish-presidenti Obama. “Të gjithë ne, këtu në skenë, nuk mund të jemi më krenarë sesa kaq nga reagimi i amerikanëve. Kur shohin të tjerët në nevojë, amerikanët thjesht ngrihen në këmbë”, tha ai.
Në koncert morën pjesë artistë si Alabama, Lady Gaga, Gatlin Brothers, Robert Earl Keene etj. Ish-presidentët krijuan organizatën “Një Amerikë”, për të ndihmuar përpjekjet e ndihmës pas shkatërrimeve të shkaktuara nga uraganët e fuqishëm kohët e fundit, sidomos në Teksas, Florida, Porto Riko dhe pjesë të tjera të zonës së gjirit të Meksikës dhe Karaibeve. Deri më tani janë mbledhur rreth 31milionë dollar ndihma.
