Një makinë ka përplasur për vdekje një person që lëvizte me biçikletë në fshatin Ferras, në rrugën dytësore Levan-Vlorë.
Viktima, rreth 70-vjeç, është gjetur i pajetë në cep të rrugës nga banorët e zonës.
“Rreth orës 17:30, në aksin rrugor ‘Fier-Vlorë’, në fshatin Ferras, një automjet me drejtues ende të paidentifikuar, ka përplasur shtetasin Y. T., rreth 70 vjeç, banues në fshatin Fitore, i cili dyshohet se ka qënë duke lëvizur me biçikletë. Si pasojë e përplasjes, shtetasi Y. T. ka humbur jetën”, njoftoi policia.
Grupi hetimor po punon për identifikimin dhe kapjen e drejtuesit të automjetit, si dhe për zbardhjen e rrethanave të aksidentit, shtuan të njëjtat burime.
