Komisioni i Organizimit dhe Kontrollit të Operacioneve Elektorale në Partinë Demokratike shpjegoi “formulën” e Primareve që do të zhvillohen për të përzgjedhur 61 kandidatët e opozitës për zgjedhjet lokale të 14 majit. Gjithashtu PD zbuloi datën e përzgjedhjes së kandidatëve për primaret, proces që do të realizohet nga 6 deri më 13 nëntor.
Kryetarja e Komisionit të Organizimit dhe Kontrollit të Operacioneve Elektorale, Albana Vokshi është shprehur se zgjedhjet për primaret do të zhvillohen në 72 degët e Partisë Demokratike.
Gjatë një deklarate për mediat nga selia blu, Vokshi u shpreh se çdo qytetar mund të votojë, duke u regjistruar si simpatizant në afatet e përcaktuara dhe të vendosë të votojë për kandidatin për qytetar të parë në bashkinë ku jeton.
“Ajo që unë dua të theksoj është fakti që primaret janë një proces gjithëpërfshirës. Për herë të parë është aplikuar nga Partia Demokratike në zgjedhjet e pjesshme të 6 marsit, në 6 bashkitë ku u zhvilluan zgjedhjet. Por tashmë primaret do të zhvillohen në 72 degët e Partisë Demokratike.
Ato jo vetëm nuk lënë jashtë askënd, por kushdo që beson që ka mbështetje në elektoratin opozitar, por jo vetëm, mund të kandidojë sipas rregullave të caktuara që ne do t’i shpjegojmë edhe sot. Çdo qytetar që beson se vota e tij vlen mund të regjistrohet si simpatizant në afatet e përcaktuara dhe të vendosë të votojë për kandidatin për qytetar të parë në bashkinë ku jeton. Primaret janë themeli i besueshmërisë së Partisë Demokratike, e cila lindi dhe vazhdon të jetë parti e votës së lirë, parti e njerëzve të lirë.
Primaret do t’u tregojnë edhe njëherë qytetarëve, për tej Partisë Demokratike, se ne jemi alternativa më e mirë për të qeverisur jo vetëm bashkitë, por për të qeverisur vendin”, tha Albana Vokshi.
