Komisioni i Organizimit dhe Kontrollit të Operacioneve Elektorale në Partinë Demokratike zhvilloi sot një konferencë për mediat ku shpjegoi “formulën” e Primareve që do të zhvillohen për të përzgjedhur 61 kandidatët e opozitës për zgjedhjet lokale të 14 majit.
Gjatë konferencës për shtyp, Eno Bozdo zbuloi datën e përzgjedhjes së kandidatëve për primaret, proces që do të realizohet nga 6 deri më 13 nëntor.
Ai deklaroi më tej se janë përcaktuar edhe dy elementë që nuk kanë qenë në primaret e para më 6 mars, si vendosja e balotazhit dhe më kryesorja vendosja e një debati midis kandidatëve të PD.
“Sot kemi dy operacione për të cilat ne jemi përgjegjëse, i pari ka të bëjë me regjistrimin e kandidatëve për primaret, kanë ndodhur deklarime dhe i dyti ka të bëjë me fillimin e procesit. Këto po zhvillohen. Data për të bërë përzgjedhjen e kandidatëve do të jetë nga data 6-13 nëntor. KOKO do të realizojë procesin e përzgjedhjes së primareve. Përzgjedhja e kandidatëve do të jetë nga 6 deri 13 nëntor, në rregullore përcakton dy gjëra të rëndësishme që nuk i kemi pasur. Vendosja e balotazhit si instrument për të përcaktuar fituesin, kur voton kandidati më i mirë dhe e dyta vendosja e disa rregullave bazë. Komisioni gjithashtu do të menaxhojë ankimimin e palëve të interesuara. Roli është si gjykatë e shkallës së parë që trajton çështjet që ngrihen për parregullsi”, tha Eno Bozdo.
Gjithashtu, Bozdo sqaroi edhe njëherë se afati i fundit për dorëzimin e dokumentacionin për bashkitë Durrës, Tiranë dhe Elbasan është data 6 nëntor, ora 20:00. Ndërkohë, për bashkitë e tjera është 8 nëntor ora 20:00 dhe pas këtij afati nuk pranohet asnjë kandidaturë.
Sa i përket datës së përmbylljes së të gjithë procesit në çdo degë të PD, deputetja Albana Vokshi pohoi se do te jetë 4 dhjetori.
“Deri më sot është data 4 Dhjetor, ku do të përfundojnë primaret në të gjitha degët e vendit”, tha kryetarja e KOKOE.
Më tej Vokshi i drejtoi një ftesë të gjithë simpatizantëve që t’i bashkohen procesit të Primareve, i cili do të jetë gjithëpërfshirës duke u zhvilluar në 72 degët e Partisë Demokratike.
“Ajo që unë dua të theksoj është fakti që primaret janë një proces gjithëpërfshirës. Është risi. Për herë të parë është aplikuar nga Partia Demokratike në zgjedhjet e pjesshme të 6 marsit, në 6 bashkitë ku u zhvilluan zgjedhjet. Por tashmë primaret do të zhvillohen në 72 degët e Partisë Demokratike. Ato jo vetëm nuk lënë jashtë askënd, por kushdo që beson që ka mbështetje në elektoratin opozitar, por jo vetëm, mund të kandidojë sipas rregullave të caktuara që ne do t’i shpjegojmë edhe sot”, deklaroi Vokshi.
Por, deputetja demokrate nuk u ndal vetëm te mbështetësit e opozitës, por përfshiu në thirrjen e saj për të votuar në këtë proces demokratik të përzgjedhjes së kandidatëve, të gjithë qytetarët që duan të regjistrohen si simpatizantë.
“Çdo qytetar që beson se vota e tij vlen mund të regjistrohet si simpatizant në afatet e përcaktuara dhe të vendosë të votojë për kandidatin për qytetar të parë në bashkinë ku jeton. Primaret janë themeli i besueshmërisë së Partisë Demokratike, e cila lindi dhe vazhdon të jetë parti e votës së lirë, parti e njerëzve të lirë. Primaret do t’u tregojnë edhe njëherë qytetarëve ,për tej Partisë Demokratike, se ne jemi alternativa më e mirë për të qeverisur jo vetëm bashkitë, por për të qeverisur vendin”, theksoi ajo.
