Gazetari Klodian Tomorri deklaroi në studion e emisionit “MCN Economy” se Bordi i Transparencës që vendos çmimet e karburanteve nuk duhet të ekzistojë më pasi po vret konkurrencën që është elementi i vetëm që i mban çmimet të ulëta.
Duke vijuar shpjegimin e tij, Tomorri tha se Bordi është shndërruar në spekulatorin më të madh në treg dhe se qeveria është përfituesi kryesor i çmimeve të larta.
“Ajo që bën Bordi i Transparencës është vrasja e konkurrencës në treg dhe është elementi i vetëm që mban çmimet e ulëta dhe nuk lejon spekulim. Sot Bordi fikson një çmim fiks për të gjitha pikat e karburanteve. Ata e nisën kështu në fillim, por u dekonspiruan kur kompanitë e vogla filluan ta ulnin çmimin deri në 15 lekë gjë që e demaskoi Bordin si organizëm çmimesh. U shndërrua në spekulatorin më të madh në treg, nuk duhet të ekzistojë, nuk është detyrë e shtetit që të ngrejë institucione për të përcaktuar çmime në treg, por të rregullojë rregullat e lojës. Përsa kohë do jetë bordi do të kemi debat. Bordi nuk duhet të ekzistojë, është e provuar dhe nga të tjerë nuk ka mekanizëm që përcakton çmimet me një dorë të vetme. Nëse përcakton çmimin 240 lekë për litër, mund të ketë pika në pozicione të mira dhe mund të shesin më poshtë këtij çmimi por bordi nuk e lejon duke vrarë konkurrencën. Si përcaktohet çmimi është standarde. Bordi ka krijuar një instrument që i ka ngatërruar më shumë gjërat. Sa herë duhet të mblidhet bordi? Çmimi i naftës në bursë ndryshon çdo orë, si mund të pretendosh që po lufton spekulimin ndërkohë që në bursë çmimi ndryshon me minuta kur ti e mbledh bordin një herë në 2 javë“, tha ai.
“Qeveria është përfituesi kryesor i çmimeve të larta pasi arkëton më shumë. Në rastin e karburanteve arkëton nga tatimi mbi vlerën e shtuar dhe për akcizën. Sa më i lartë rritja e çmimeve aq më shumë rritet dhe akciza që ne paguajmë tek karburantet. Nuk kemi prova nëse Bordi po bashkëvepron me tregtarët e karburanteve. Qeveria pretendon që mbron interesin, tregtarët nga ana tjetër ankohen për bordin. Ekzistenca e bordit është minimi më i madh i tregut të karburantit. Bordi nuk duhet të ekzistojë, qeveria ka vetëm një detyrë të ruajë konkurrencën dhe tregun e hapur“, shtoi.
