Marrëdhëniet midis Republikës Islamike të Iranit dhe Shqipërisë nuk ka qenë kurrë më të këqija se aktualisht, teksa Teherani dhe Tirana zyrtare janë përplasur vazhdimisht me deklarata që pas nisjes së sulmit kibernetik mbi e-Albania dhe sistemeve të tjera elektronike të të dhënave në Policinë e Shtetit.
Krisja e fortë, që shtyu kryeministrin Edi Rama të merrte vendimin drastik për të dëbuar nga vendi stafin e ambasadës së Iranit me një afat 24 orësh, e ka burimin te kampi i muxhahedinëve në MEK.
Që prej nënshkrimit të marrëveshjes me SHBA për mirëpritjen e anëtarëve të opozitës iraniane në kampin “Ashraf 3”, Shqipëria ka qenë në vëmendjen e regjimit të ajatollahëve, por tensionet mes dy vendeve duket se kanë arritur tanimë pikën e vlimit.
Kjo pasi Irani e ka vendosur zyrtarisht Shqipërinë në listën e vendeve armike, ashtu siç Edi Rama bëri në shtator dhe për më tepër Garda Revolucionare e ka bërë pjesë të objektivave që synon të godasë me dronë dhe raketa.
Në listën e objektivave renditen bazat kryesore amerikane në Lindjen e Mesme, Izraeli dhe Shqipëria.
Në sekuencat e një video të publikuar në aplikacionin Telegram nga Garda Revolucionare e Iranit shfaqen imazhe satelitore të kampit të muxhahedinëve të MEK në Manëz të Durrësit.
Në video gjithashtu shfaqen njëra pas tjetrës objektivat e dronëve dhe raketave të Iranit, ku përfshihen qyteti i Tel Avitit dhe disa bazat amerikane, ndërsa në fund, iranianët theksojnë se kanë gjithçka nën kontroll dhe se mund të godasin kur të duan.
Publikimi i videos vjen në të njëjtën kohë kur Irani po teston forcën e vetë duke sfiduar armët e Perëndimit, indirekt nëpërmjet furnizimit me armë dhe dronë të Rusisë, mjete të cilat Kremlini po i përdor në luftën me Ukrainën.
Teherani gjithashtu po përgatitet të dërgojë rreth 1000 armë shtesë, duke përfshirë raketa balistike me rreze të shkurtër tokë-tokë dhe më shumë dronë sulmues në Rusi.
Dërgesa po monitorohet nga afër, sepse do të ishte rasti i parë i dërgimit të raketave të avancuara me precizion nga Irani në Rusi, gjë që mund t’i japë Kremlinit një ndihmë të konsiderueshme në fushën e betejës.
