Nga Boldnews.al
Fondi Shqiptar i Zhvillimit është kthyer në një “lavatriçe” parash publike. Përveç rrogave të majme, ku shoferët e këtij institucioni marrin rrogë më shumë se mjekët, ky institucion po shpenzon para pa kufij, me të ashtuquajtura “zhvillime rajonesh”.
Dhjetëra miliona euro janë tenderuar kohët e fundit për disa parqe, kënde sportive apo edhe menutë e famshme. Por, kreu i FSHZH-së, Dritan Agolli, nuk është ndalur me kaq. Ai ka hapur një tender edhe për ecjet në… natyrë!
Por, nëse ecën në natyrë, për çfarë të duhen paratë?
Ecja është pa para, mjafton që të ketë parqe apo edhe zona të tilla, të cilat po zvogëlohen dita-ditës. Natyrisht, me këtë politikë të shtetarëve që na drejtojnë, s’është e largët dita që në këtë vend të qëndrojnë vetëm ata.
Sipas dokumenteve që disponon BoldNews.al, Agolli ka urdhëruar hapjen e tenderit me objekt “ndërhyrje për përmirësimin e infrastrukturës turistike që lidhet sportet natyrore, aktivitetet në natyrë, ecjen, etj”.
Pra, përmirësime të natyrë! Nëse dje, Ferdinand Xhaferri, u bë i famshëm për “përmirësimin e diellit”, tashmë nuk mbetet pas edhe Dritan Agolli, i cili shpenzon para edhe për ecjen në natyrë apo disiplinën e ecjes sportive.
Fondi i këtij tenderi është plot 83.333.333 lekë, para të cilat fare mirë mund të shkonin për t’u ardhur në ndihmë shtresave në nevojë, ose për blerjen e aparaturave mjekësore në spitale apo qendra shëndetësore. Një shpenzim i kotë, pasi vetëm për të ecur, apo për të bërë disa shtigje, që kush e merr vesh se ku janë e çdo bëhet, shpenzohen gati 1 miliardë lekë të vjetra me TVSH.
Nëse FSHZH-ja ka para’ me “thasë”, për instalacione në Kryeministri, për pistën e Formula 1 në Elbasan, për hartimin e menuve, apo për ecjen, gjithkush mund të mendojë se “mbaruan hallet” dhe tashmë po mendojnë për natyrën.
Por, nëse do të dalësh jashtë unazës së kryeqytetit, në periferi, qytete të tjera, fshatra, do të kuptosh se Shqipëria po braktiset. Shkolla me nga 3 kate vetëm me 5 nxënës. Apo pallate në qyteza vetëm me 1 familje që banon. Por, jo për syret e disave që mendojnë si ti shpenzojnë këto para.
