Krisja në marrëdhënien midis kryeministrit Edi Rama dhe televizionit kombëtar Top Channel duket se është thelluar deri në pikën sa shefi i qeverisë e sulmon hapur edhe në takimet e tij publike me qytetarët.
Pas reagimeve me tone të ashpra që bëri ditën e djeshme në Twitter, ku rendiste tre tituj të kronikave që janë transmetuar në ekranin e Top Channel, duke akuzuar median në fjalë se po dezinformon publikun, Rama u ndal sërish te kjo çështje teksa ndodhej në Ersekë.
Teksa dje i cilësoi një formë shantazhi për të kërkuar favore nga qeverisë, kronikat e TCH, Rama sot i ka cilësuar ato si banale.
“‘700 mijë shqiptarë kanë ikur 12 vitet e fundit’, ‘7 punonjës në ditë ikin nga policia’, ‘Tri vite pas tërmetit s’kanë shtëpi’. Këta janë tituj lajmesh të rreme në ekrane private kombëtare që kanë një mision: Dizinformim e nxitje kundër qeverisë! Arsyeja? Duan favore të paligjshme!”, shkruante shefi i qeverisë në Twitter.
Ai u ndal sot në veçanti te titulli i kronikës së publikuar mbrëmjen e djeshme që ishte ekzaktësisht ky: “Një në tre shqiptarë ikin / Eurostat: 2008-2020, 778 149 morën leje qëndrimi në BE”.
Kreu i qeverisë sërish rreket të mos pranojë shifrat që paraqet TCH duke ju referuar Eurostat dhe me ironi shprehet se “pa pikë turpi” po e ballafaqojnë qeverinë me lejet e qëndrimit.
“Ajo është një aleancë rublash të cilat u bëjnë pasqyrë disa media që bëjnë deklarata nga më banalet. Ikën 700 mijë shqiptare dhe si fakt pa pikë turpi nxjerrin lejet e qëndrimit. Duke e ditur mirë që nuk përkojnë me vitet. Po, kujt t’ia thuash. Gjithsesi ju uroj suksese në punën tuaj”, tha Rama.
Sakaq, kujtojmë se kronikat e publikuara nga TCH kishin në fokusin e tyre emigrimin masiv të shqiptarëve në dekadën që Edi Rama ka qenë kryeministër (duke çuar rrjedhimit në shpopullim), largimin e efektivëve të policisë nga detyra prej kushteve të këqija të punës e pagave të ulëta dhe dështimin me procesin e “Rindërtimit”.
