Policia e Tiranës në një komunikatë për shtyp ka zbuluar detaje të reja mbi ngjarjen e ndodhur te “Kodra e Diellit, ku Briken Sanaj u ekzekutua me armë zjarri.
Sipas Bluve të kryeqytetit janë ende të paqarta rrethanat në të cilat është qëlluar 39-vjeçari, por një makinë e djegur është gjetur në afërsi të Qafë-Kasharit dhe dyshohet se ju përket autorëve.
Policia sqaron se ka shoqëruar disa persona në polici, ndërsa janë ngritur pika kontrolli dhe po vijon krehjen e zonës.
Njoftimi i policisë:
Më datë 30.10.2022, te Kodra e Diellit, në rrethana ende të paqarta, është qëlluar me armë zjarri shtetasi B. S., rreth 39 vjeç, i cili ka ndërruar jetë rrugës për në spital.
Shërbimet e Policisë kanë shkuar menjëherë në vendngjarje, kanë ngritur pika kontrolli dhe vijojnë krehjen e zonës për identifikimin dhe kapjen e autorit/ëve.
Janë shoqëruar disa persona në Polici.
Në Qafë Kashar, në afërsi të një biznesi pllakash, është gjetur duke u djegur, një automjet.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
