Klubet e mëdha të Europës nuk shqetësohen vetëm për rezultatet e fushës, por edhe për merkaton e dimrit dhe atë të verës. Mes skuadrave më aktive është padyshim Inter-i, me drejtuesit që duan t’i bëjnë ndonjë dhuratë të rëndësishme trajnerit Inzaghi.
Në këtë aspekt, klubi zikaltër duket se ka vënë në shënjestër objektivin e parë. Bëhet fjalë për Marcus Thuram, sulmues i datëlindjes 1997 në pronësi të Borussia Monchengladbach.
Klubi mialnez beson se futbollisti është profili i duhur për të përforcuar repartin sulmues të trajnerit Inzaghi, aq sa do të provojë ta marrë që në merkaton që do të hapet pas pak më shumë se dy muajsh.
Sipas portalit spanjoll fichajes.net, Marotta duket se ka ndërmend t’i shkojë deri në fund, veçanërisht sepse djaloshi mund të merret në janar me kushte të favorshme. Kontrata që i skadon në 2023-shin, në fakt, nuk e lejon Borussia-n që të kërkojë shifra të ekzagjeruara.
Në rast se operacioni nuk do të realizohet në janar, atëherë klubi italian do të kërkojë t’ia vërë në dispozicion Inzaghi-t verën e ardhshme. Thuram është shmë i tunduar nga mundësia për të luajtur në një kampionat të ri dhe në një klub të rëndësishëm.
Megjithatë, para se të hidhet në sulm për Thuram, Inter do të provojë të shesë njërin mes Dzeko-s dhe Correa-s, në mënyrë që të lirojë një vend dhe, mbi të gjitha, të lirohet nga një rrogë e rëndësishme.
Ndalesa e kampionateve për shkak të Botërorit në Katar mund të përfaqësojë mundësinë e duhur për të nisur negociatat me klubin gjerman, në mënyrë që t’i dhurojë trajnerit Inzaghi përforcimin e parë të vitit të ri.
