Sindikata e pedagogëve bën me dije se kjo javë do të mbyllet me bojkot të mësimit në universitete.
Në protestën e sotme para Korpusit Universitar në Tiranë, kreu i Sindikatës Sandër Kovaçi tha se përgjigjja e Ministrisë së Arsimit nuk përmbush dy pikat kryesore të tyre: rritja e pagave dhe financimi për kërkimin shkencor.
Kovaçi tha se nesër do merret një vendim lidhur me vijimin e bojkotit mësimor, ndërsa shtoi se protestat do vijojnë deri në plotësimin e kërkesave të tyre.
“Ministria e Arsimit ka sjellë një përgjigje, një pjesë e kërkesave mendojnë se do jenë të zgjidhshme se kanë qenë pengesa të neglizhencës, ndërsa problemi kryesor që ka të bëjë me rritjen e financimit për arsimin e lartë, apo financimin e kërkimit shkencor, nuk janë ezauruar. I konsiderojmë pika kryesore, edhe 8% e rritjes së pagës deri tani vetëm një universitet ka thënë se mund ta realizojë vetëm për këtë vit. Të tjerët nuk kanë marrë një vendim. Vijojmë me kërkesën për rritjen e pagës. Insistojmë në kërkesat tona, se mendojmë se janë të drejta. Do vijojmë presionin, duke qenë se pr/buxheti po diskutohet në parlament. Kjo javë mbyllet me bojkot. I bëjmë thirrje Asambleve të mblidhen dhe të marrin një vendim. Profesorati është i pakënaqur nga kjo përgjigje. Në këtë kontekst sot e nesër vijon bojkoti. Do vijojmë protestat deri sa të marrin rrugë kërkesat tona”, u shpreh Kovaçi për gazetarët.
Akademikët i kanë dërguar një peticion me disa kërkesa qeverisë. Ata kërkojnë rritje 50 për qind të pagave bazë sipas titujve shkencorë në dy faza, vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie, rritje të financimit për kërkimin shkencor, rivlerësim të orës mësimore leksion e seminar, rishikim të tatimit prej 23% mbi pagesën e ngarkesës shtesë, si dhe transparencë mbi buxhetin dhe të ardhurat e universiteteve publike.
