Rreth një muaj më parë, në 28 shtator u arrestua në Tiranë për llogari të policisë së Gjirokastrës Ardian Kola, i njohur gjerësisht në publik si i famshmi “Dj Cherry” i emisionit “Zonë e Lirë”, me moderator Arian Çanin.
Në njoftimin e policisë asokohe thuhej se Cherry ishte vënë në pranga, pasi prej katër muajsh ishte shpallur në kërkim.
Ai akuzohej se i kishte ikur postbllokut të policisë së Gjirokastrës në vendin e quajtur “Ura e Lumit”, pasi me makinën e tij transportonte kundrejt fitimit emigrantë nga Lindja, për të kryer kalimin e paligjshëm të kufirit drejt Europës.
Gjykata për DJ e njohur ka vendosur masën e sigurisë “arrest në shtëpi” dhe Cherry ka shpjeguar në një intervistë për JOQ të gjithë të vërtetën rreth lajmit për ndalimin e tij që bëri bujë në rrjet.
Në rrëfimin e tij, DJ Cherry pretendon se natën që është ndaluar nga një efektiv dhe jo patrulla e Policisë së Gjirokastrës, ai ndodhej në makinë vetëm me djalin e tij dhe udhëtonte drejt Tiranës pasi kishte qenë me pushime në Jug.
Ndër të tjera ai thotë se ka vendosur të largohet jashtë Shqipërisë bashkë me familjen e tij.
Por, policia në versionin e saj pretendon se më datë 19 qershor, në vendin e quajtur “Ura e Lumit”, Kola nuk i është bindur urdhrit të punonjësve të Policisë për të ndaluar automjetin.
Ai ka vazhduar lëvizjen me shpejtësi dhe më pas ka braktisur automjetin me të cilin dyshohet se po transportonte 5 emigrantë të paligjshëm nga vendet MENA, në drejtim të Tiranës, kundrejt fitimit.
RRËFIMI I DJ CHERRY:
Unë jam Ardian Kola. Historia ime është mëse e thjeshtë. Tani jam në “arrest shtëpie” për një shpifje. Isha në pushime në Vlorë, pastaj në Sarandë. Mora djalin dhe do e sillja në Tiranë. Në Gjirokastër më ndaloi patrulla. Duke qenë se isha me shapka dola zbathur. Arsyeja e ndalimit ishin xhamat e zinj. Iu prezantova, punoj në media. Si e kemi ne shqiptarët.
Aty plasi debati, ai mund të ishte gabimi im. Ishte polic i vetëm. Polic rendi, jo rrugor. Kush jam unë, kush je ti, këto debatet banale. Hip në makinë tha, më jep dokumentet tha se nuk ikën ti pa na lënë diçka. Ika dhe mendova për djalin pastaj. E lashë makinën 2 km më tutje. Lashë makinën, mora çunin. Prita. Makinën ia kisha marrë me qera se lëviz shumë gjatë verës. U arrestova më vonë në mes të Bllokut.
Më shoqëruan, nuk më jepnin asnjë lloj informacioni. Kam ikur Tiranë-Gjirokastër me pranga. Sipas policit unë paskam qenë me emigrantë. Policia konstatoi se nuk kishin lidhje me mua, Prokuroria kërkon burg. 7 vjet burg kërkojnë më duket. Tani jam me arrest shtëpie. Është e turpshme, kam vendosur që të iki nga ky shtet. Pres vetëm vendimin e Gjykatës. Përtej shakave, më ndihmoi Zoti që qëllova me gjyqtar të saktë, se përndryshe këtu…
