Nga Boldnews.al
Dy ditë para vendimit të Këshillit të Rregullimit të Territorit për të konfiskuar ndërtimet pa leje në Tiranë, Ministria e Mbrojtjes, ka shpallur fituesin e një tenderi të majmë rreth 4 milionë euro. Por, çfarë i lidh këto të dyja, tenderin e Peleshit dhe konfiskimet?! Të dyja kanë një emërues të përbashkët, firmën “Salillari”.
Nga njëra anë, kjo firmë është shpallur fituese e këtij tenderi, megjithëse s’ka pasur ofertën me të ulët dhe nga ana tjetër, katet dhe metrat katrorë pa leje të saj, nuk u konfiskuan! Një favorizim i hapur ndaj Salillarit, teksa janë ngritur hije të mëdha dyshimi se e gjithë farsa e këtyre ndërtimeve nuk mund të jetë veçse një “gjobë” e ligjëruar, kësaj herë nga eksponentë të qeverisë.
Përse 1200 metrat e Salillarit nuk u konfiskuan, ku vlera e tyre në treg është shumë e madhe? Dhe përse, e njëjta firmë favorizohet në tendera?
Sipas dokumenteve që disponon BoldNews.al, në datën 17 tetor 2022, Ministria e Mbrojtjes i ka dërguar një njoftim “Salillarit” që e shpallte fituese të një tenderi. Në dokumente thuhet se përshkrimi i kontratës është “ndërtimi i perimetrit të sigurisë në Bazën Ajrore Kuçovë”. Në të njëjta dokumente shkruhet se bëhet fjalë për ndriçimin, vendosja e kamerave të sigurisë dhe vendosja e sensorëve të zbulimit të ndërhyrjeve përgjatë rrethimit.
Fondi i këtij tenderi ka qenë 458.143.000 lekë pa TVSH. Mësohet se kohëzgjatja e kontratës është “duke filluar nga data e fillimit të punimeve me përfundim brenda 365 ditëve”.
Në dokumente është shkruar se kriteret e përzgjedhjes janë çmimi më i ulët, ndërsa kanë marrë pjesë “SALILLARI” me ofertë në vlerën 434.713.137 lekë pa TVSH dhe operatori ekonomik “HASTOÇI” me ofertë në vlerën 425.983.931 lekë pa TVSH. Pra, oferta e dytë ka qenë rreth 100 mijë euro më e ulët se ajo e “Salillarit”.
Por, këtu futet “makineria” shtetërore, ajo që bën propaganda çdo ditë dhe mundohet të kamuflojë tenderat me shumë zero. Ministria e Mbrojtjes shkruan se firma që ofroi më pak, “HASTOÇI” është s’kualifikuar nga gara, pasi “ka gabime aritmetike dhe shumat absolute të të gjitha korrigjimeve janë në një vlerë më të lartë se 2% e vlerës së ofertës ekonomike të ofruar”.
“Konkretisht në ofertën e paraqitur nga ky ofertues, vlera e punimeve të seksionit instalimet e sistemit me sensor fiber optike me TVSH duhet të ishte në shumën 37.499.972 lekë dhe jo 34,099,972 lekë”, thuhet në dokumente. Por, nëse një firmë e merr përsipër ta bëjë më me pak lekë, përse nuk lejohet?!
“Shuma absolute e korrigjimeve është 25.170.000 lekë, vlerë kjo më e lartë se 2% e vlerës së ofertës ekonomike të ofruar” thuhet në dokumente. Një vlerësim tepër teknik, që hedh dyshime se gjithçka ka qenë e paracaktuar dhe se “Salillari”, e cila njihet për fitimin e dhjetëra tenderave në qarkun e Beratit të fitojë edhe këto miliona nga Ministria e Mbrojtjes.
