Rishi Sunak është tashmë kryeministri i 57-të i Mbretërisë së Bashkuar. Ai është kryeministri i tretë këtë vit dhe do të hyjë në Downing Street si kryeministri më i ri në dy shekuj.
Sunak është takuar në Pallatin Buckingham me Mbretin Charles. BBC shkruan se audienca mes mbretit Charles dhe kryeministrit të ri, Rishi Sunak, shënon dorëzimin simbolik të pushtetit, në një përzierje ceremonie dhe pragmatizmi politik. Është një ritual vazhdimësie, në një sfond të trazirave të mëdha politike.
Ky është një nga rolet kyçe kushtetuese të Mbretit – dhe që nëna e tij e mori shumë seriozisht, aq sa, pavarësisht nga shëndeti i saj i sëmurë, ajo kreu me këmbëngulje takimin e saj të fundit me Liz Truss, kur ajo u bë kryeministre muajin e kaluar.
Quhet “puthje duarsh”, por ka më shumë gjasa të ketë qenë një përkulje dhe një shtrëngim duarsh, në një takim ku monarku i kërkon zyrtarisht kryeministrit të ri të formojë një qeveri.
Pas disa fotografive zyrtare në fillim, ky do të ketë qenë një takim privat, duke vendosur një model për audiencat konfidenciale javore që mbahen mes Mbretit dhe Kryeministrit.
