Pedagogët janë duke zhvilluar sot protestën e tyre kombëtare të radhës, teksa i japin jetë javës së dytë të bojkotit të auditorëve, duke rritur presionin mbi kryeministrin Edi Rama, i cili duhet të japë llogari për kostot e një viti akademik që është në rrezik.
Sindikata duket e palëkundur në qëndrimet e saj pavarësisht se Rama në turin e tij të takimeve me qytetarët ka sulmuar kreun e tyre duke e etiketuar si ish-anëtar të SHIK-ut dhe pedagogët si “ballistë të Foltores”.
Duket se kërcënimet, shantazhet dhe sulmet e Ramës nuk i merr parasysh as Mimoza Hafizi, pedagoge e Fakultetit të Shkencave të Natyrës dhe ish-deputete e Partisë Socialiste.
Ajo i është bashkuar protestës së sotme të kolegëve për të dalë hapur në mbështetje të kauzës, ku kërkohet rritje page, në një kohë që qeveria iu është përgjigjur me një rritje deri në 15%.
Kujtojmë se Hafizi vetëm pak ditë më parë shprehu shqetësimin e saj publik për mbylljen dhjetëra degëve në disa universitete publike në vend.
Astrofizikantja e njohur e konsideroi një dramë faktin që në FSHN janë regjistruar 105 studentë gjithsej me Fizikën që ka vetëm 10 studentë, Kimia me 12, Matematika që ka 25 studentë dhe Biologjia vetëm 55 studentë.
“Fizika ka qenë dega nismëtare e krijimit të këtij universiteti. Dekada të tëra, fizika bënte të ëndërronin me qindra të rinj. Sot, VETËM 10 STUDENTË! Nesër ndoshta asnjë fizikan e asnjë mësues fizike, për të mësuar nxënësit në shkolla. Braktisja e saj, braktisja e Shkencave të Natyrës, është treguesi më ulëritës se atdheut tonë fatkeqësisht i kanë dalë tepër njerëzit e dijes. Vendet e punës për studentët e diplomuar me standarde të larta në këto fusha janë limituar skajshëm. Perspektivat për ta janë thuajse të mbyllura. E papritur këto dy histori paralele po ndërthuren në këtë vjeshtë, në fillim të vitit të ri akademik”, shkruante Hafizi në rrjetet sociale.
