Ish-sulmuesi i përfaqësueses shqiptare, Shkëlzen Gashi, është veshur përsëri me petkun e protagonistit në kategorinë e dytë zvicerane, teksa sot ka shënuar 2 golat e parë të këtij sezoni. Bomberi i cili mban edhe shiritin e kapitenit në radhët e skuadrës së Arau, ka treguar se nuk ka humbur nuhatjen para portës.
Ai shënoi në fundin e pjesës së parë dhe pastaj në fillimin e pjesës së dytë, duke çuar në 2-0 shifrat për ekipin e tij që kështu mori një avantazh të rëndësishëm. Por skuadra e Arau nuk ia doli të ruante epërsinë, duke u barazuar nga miqtë. Dhe ndonëse kaloi përsëri në avantazh më vonë me Valon Fazliun, u arrit në barazimin përfundimtar 3-3 në minutat e fundit të sfidës.
Kështu, Arau i Gashit vazhdon të notojë në mesin e tabelës së klasifikimit në kampionat, ku nuk fiton tashmë që nga 8 shtatori, me serinë pa suksese që ka shkuar në 5 ndeshje radhazi.
