Kryeministri i vendit, Edi Rama gjatë një takimi të zhvilluar në Elbasan u ka bërë thirrje të rinjve që të mësojnë teknologjinë dhe “gjuhën e kodimit” pasi sipas tij kjo u jep mundësi atyre që të fitojnë më shumë se kryetari i bashkisë.
Në një kohë kur shifrat e shpopullimit në Shqipëri kanë arritur në nivele alarmante, kryeministri Rama u kërkoi të rinjve mos largohen drejt Anglisë me gomone por të punojnë duke hapur biznese të llojit agro-turizëm në qytetin e tyre.
“Teknologjia iu jep mundësi të punësoheni kudo nëpër botë dhe të paguheni disa herë më mirë se kryetari i bashkisë. Për këtë duhet mësuar kodimi. Ne do hapim programet e trajnimit intensiv që të japim dijen e nevojshme që ti të jesh i gatshëm të hysh në tregun e punës si kodues.Tendenca kjo është. Nga një ide e thjeshtë shumë e bukur mund të lindë një biznes. Një biznes i cili mund të punësojë jo pak njerëz. Të bësh agroturizëm nuk është një ndërmarrje e komplikuar, por kërkon vizion të qartë, ambicie, durim dhe patjetër shumë punë. Sot e mira është që mund të flitet me gjëra që ndodhin këtu. Unë insistoj që të paguash para, siç ndodh në rastin e të rinjve që ikin në Angli me varka, të paguash 20 mijë paund, ndërkohë që mund të bësh agroturizëm, të hapësh bujtinë dhe të fillosh të gjenerosh të ardhura nuk është një krahasim i vështirë”, tha Rama.
