Pengesat që po has me projektligjin për Amnistinë Fiskale dhe thirrjet e vazhdueshme të SHBA dhe BE në çdo tryezë diskutimi mbi ekonominë në Tiranë kundër kësaj nisme duket se e kanë nxjerrë jashtë kontrollit kryeministrin Edi Rama.
Shefi i qeverisë e ka humbur toruan dhe këtë e ka treguar në takimin e tij membështetësit e majtë në Gjirokastër, ku i ka kërkuar llogari BE-së se përse do t’i ndalojë shqiptarët që sipas tij të sjellin kursimet e tyre në atdhe.
“Por kur na thanë bëjeni, një shtet na tha por jo për ata që punojnë tek ne. Po pse? Paratë i doni atje, po jo se do i sjellin këtu ata se janë shqiptarë”, u shpreh kryeministri.
Sa i përket konstatimeve nga ndërkombëtarët se aplikimi i draftit do t’i hapte rrugën pastrimit të parave të pista dhe përfshirjes së krimit në biznes, Rama i është përgjigjur duke thënë se këto para që do legalizohen janë mbledhur me djersë nga ata që kanë vjelur pjeshkë në Greqi e kanë punuar në ndërtim në Europë.
“Ju nuk bëni dot amnisti fiskale se është për krimin? Po pse? ata shqiptarë që janë jashtë, kriminelë janë? Sa kohë kanë punuar ata në të zeze, nëpër mandarinat dhe pjeshkë e grekëve? Sa kohë kanë mbledhur ata para, duke fjetur në pemë. Kam takuar nga ata që kanë fjetur në pemë. Ku i kanë çuar ato para? Një pjesë të madhe të parave i kanë kursyer këtu dhe një pjesë andej. Po ku i bënë këta që na tregojnë ne se u bënë qelibar i bardhë, kush e shpiku punën e zezë? Punën e tyre të zezë s’mund ta legalizojnë. Do ju nxihet jeta sa herë që duan të blejnë një shtëpi këtu apo të bëjnë një biznes, se ju shkon prokurori dhe i pyet; ku i gjete lekët? E kemi parë në anketimet që kemi bërë dhe këshillimin Kombëtar. Morën pjesë 500 mijë njerëz”, tha Rama.
Duke theksuar më tej se qeveria nuk ka ndërmend të tërhiqet nga ligji, pasi tha “do e bëjmë dhe do e bëjmë në bashkëpunim me partnerët tanë”, Rama aplikoi edhe strategjinë mbrojtëse përkundrejt kritikave nga Perëndimi.
Sipas kryeministrit, Amnistia Fiskale të cilën ata kërkojnë që të mos aplikohet në Shqipëri, është shembull i kopjuar që aplikohet në Itali, SHBA dhe çdo vend Europian.
“Nëse këtë do ta kishim shpikur ne, atëherë dakord. Këtë e bën Italia rregullisht. Të gjithë ato vendet e Europës, e bëjnë shtete të Amerikës. Pse mos ta bëjmë ne? Ne do bëjmë draftin, do kërkojmë vota. Shpresoj që të ketë njerëz normal që ta pranojnë këtë. Amnistia është për të gjithë, as për demokratët dhe socialistët. Do të bëhet për të sjellë më shumë para shqiptarët këtu për të bërë ça të duan me ato para legale, në pronën e tyre, në vendin e tyre”, deklaroi Rama.
