Në një takim të zhvilluar sot me qytetarët e Gjirokastrës, kryeministri Edi Rama ka mbrojtur investimet miliona euro me paratë e taksapaguesve shqiptarë për fasadat dhe sheshet publike, në kuadër të “Rilindjes Urbane”.
Sipas shefit të qeverisë janë pikërisht këto investime që kanë rikthyer gratë nëpër parukeri dhe se pa to burrat nuk do shpenzonin për t’u veshur po do të dilnin mbuluar me gjethe.
“Duke parë rijetëzimin e kthimin e një dinjiteti. Po të ishte fasada kaq e parëndësishme s’kishte pse kriheshin gratë në floktore 2 herë në javë, dilnin të shpupuritura, as nuk lyheshin e as nuk kriheshin, as visheshin. Edhe burrat jo e jo, mbanin gjethen këtu përpara, dilnin e vazhdonin muhabetet, thoshim nuk po blejmë rrobat po blejmë bukë, me gjithë gjethe. Si qenka kjo, kaq të prapambetur janë, të zhytur në patakun e injorancës janë, e kaq të poshtër. Është edhe ligësi e madhe që ushqehet nga ligësia, verbëria, inati dhe urrejtja”, tha Rama.
Rama u mbrojt duke thënë se këto investime kanë rijetëzuar qytetet duke sjellë zhvillim dhe mirëqenie për banorët, ndërsa shtoi se akuza “mos u merrni me fasada, se s’kemi bukë” është dritshkurtësi në gjykim.
“Ndihesh i lumtur që në vendin tënd njerëzit po shkojnë ndryshe dhe po bëjnë ndryshe, Vende të bukura dhe të varfra kam parë. Por një vend të pistë dhe të pasur nuk kam parë. Mos u merrni me fasada “se s’kemi bukë”, është dritëshkurtësi. Ato fasadat sjellin më shumë bukë, janë hallkat e zinxhirit që çon deri tek buka e atyre që punësohen. Shumë e thjeshtë, si do vinin nga Greqia në Gjirokastër për të bërë turizëm, duke parë plehrat e gropat”, shtoi më tej kryeministri.
